கணவன் சண்முகத்திடம் சகல விவரங்களையும் குமுறிக்கொட்டினாள் மீனா!

"என் தம்பிக்கு பைத்தியம் பிடிச்சிருக்கு! அப்பா, கூடச் சேர்ந்து தாளம் போடறார்!"

"இதுக்கு நான் என்ன செய்யணும்?"

"என்ன கேள்வி இது? அந்த வீட்டு மாப்ளை நீங்க! அந்தக் குடும்பத்தோட மான, அவமானத்துல உங்களுக்கு பங்கு இல்லையா? உங்க பேச்சை மீறி அங்கே யாராவது நடக்க முடியுமா? ரேவதி வாழ வந்தா, அந்தக் குடும்பம் சிதறும். இதை எப்படியாவது நீங்க தடுத்து நிறுத்துங்க!"

"உன் தம்பிக்கு பிடிச்சாச்சு இல்லையா?"

"ஆமாம்!"

"நிச்சயதார்த்த தேதி குறிக்கப் போறாங்களா?"

"அது கூடாதுனுதான் நான் அவசரப் படறேன்!"

"இதப்பாரு! அவசரப்படாதே! அந்தப் பொண்ணை முதல்ல நான் பாத்துப் பேசணும். அப்புறம்தான் எந்த ஒரு முடிவையும் எடுக்க முடியும். புரியுதா?"

"சரி! நான் அம்மாகிட்டப் பேசி ஏற்பாடு பண்றேன்!"

"அவங்க வீடு எங்கே?"

"அந்த வீட்டுக்கெல்லாம் நீங்க போக வேண்டாம். உங்களுக்குனு ஒரு கௌரவம் இருக்கு! எங்க வீட்டுக்கு அவளை நான் வரவழைக்கறேன்!"

"வருவாளா?"

"மாப்ளை பாக்கணும்னா வந்துதான் ஆகணும்!"

"சரி! நாளைக்கு சாயங்காலம் ஏற்பாடு செய்!" - சண்முகம் உள்ளே போக, அவன் அம்மா மீனாவிடம் வந்தாள்.

"உன் தம்பிக்கு பிடிச்சாச்சா?"

"ஆமாம்!"

"அப்புறமா விட்ரேன் மீனா. இவனை அதுல இழுத்துவிட்டு ஏன் குழப்பத்தை உண்டாக்கறே? தப்பில்லையா?"

"இவர் அந்த வீட்டு மாப்பிள்ளை!"

"இதப்பாரு மீனா! சண்முகத்துக்கு நீ கௌரவம் தரலை! அவனை அசிங்கப் படுத்தப் போறே!"

"என்ன சொல்றீங்க?"

"ஆமாம்! உனக்கு அந்த ரேவதியைப் பிடிக்கலை! நீ தடுக்க நினைச்சும் உங்க வீட்ல யாரும் கேக்கலை. அதனால் சண்முகத்தை ஆயுதமா உபயோசிச்சு தடுக்கப் பாக்கறே!"

"சரி! அப்படித்தான் இருக்கட்டுமே! தப்பென்ன?"

"உன் புருஷன் அவமானப்படப் போறான்! அந்த ரேவதி எல்லா தகுதிகளும் உள்ள பொண்ணா இருந்தா, இவனை மதிக்க மாட்டா!"

"வாயை மூடுங்க! இவரை மதிக்கலைனா, அவ கழுத்துல என் தம்பி தாலிகட்ட மாட்டான்!"

அம்மா எரிச்சலாகி விட்டாள்.

"என் பிள்ளை மேலே வராம வாழ்க்கை யோட அடி மட்டத்துலயே இருக்கக் காரணம் நீதான். அவனை எந்தக் காலத்திலும் நீ உருப்பட விடமாட்டே!"

வெறுப்புடன் உள்ளே நடக்க,

"பெத்த பிள்ளையை உசத்தணும்னு தாயே நினைக்கலைனா எப்படி! நான் விடமாட்டேன்!"

Sign up now to get the most out of Books2Read

Discover something great at Books2Read.

Thanks for signing up for Books2Read notifications!