அன்று மாலையில் கிரிதரும் பானுமதியும் வரும் வரை கங்கா காத்திருந்தாள்!

"எப்படி இருக்கே திவ்யா!"

"அத்தை என்கூட இருக்கும்போது, நான் எப்பவும் பளிச்சுனு இருப்பேன்பா!"

"ரொம்ப நன்றி கங்கா!"

"எதுக்குண்ணே?"

"என் பொண்ணுக்கு இத்தனை நேரம் கம்பெனி குடுத்ததுக்கு!"

"நான் மூணாவது மனுஷி இல்லை நன்றி சொல்ல. உன் மகளை வளர்த்தவ!"

"என்னங்க! நேரம் ராத்திரி எட்டு! கங்கா புறப்படட்டும்!"

"அம்மா! அத்தை தனியாப் போக முடியாது. அப்பா கொண்டுபோய் விடட்டும்!"

"வேண்டாம் திவ்யா! அத்தைக்கு என்னிக்கு துணை இருந்திருக்கு? அன்னிக்கும் இல்லை! இப்பவும் இல்லை! நான் போயிடுவேன்! நீ ஜாக்ரதையா இரு! ஃபோன் பண்ணு. நான் வர்றேன்!"

கங்கா போய்விட்டாள்!

"ஏம்பா? நீங்க அத்தைகூட போகக் கூடாதா?"

"அவதான் வேண்டாம்னு சொல்றாளே?"

"அம்மா! அவ வேணும்னு கேட்டதையெல்லாம் செஞ்சீங்களா? யார் எதைச் சொல்றாங்களோ, அதைக் கேக்கமாட்டீங்களே?"

"பானு! உன் பொண்ணுக்கு தெம்பு வந்துடுச்சு! அதான் வாய் நீளுது! சரி! நீ ராத்திரி அவ கூட இரு! புத்தி சொல்லு. நான் காலைல வர்றேன்!"

டாக்டர் வந்தார். பரிசோதனை நடந்தது.

"நீங்க இப்பவே கூட கூட்டிட்டுப் போகலாம் சார்!"

"தேங்க்யூ டாக்டர்!"

"சின்னப் பொண்ணு! டென்ஷன் படாம பாத்துக்குங்க! ஆரோக்யம் முக்கியமில்லையா?"

"சரி டாக்டர்!"

பணம் கட்டிவிட்டு, திவ்யாவை அழைத்துக் கொண்டு வீடு வந்து சேர, இரவு பத்தாகிவிட்டது!

"சரி, படு திவ்யா! நல்லா தூங்கு. ஆபீசுக்கு ரெண்டு நாளைக்குப் போக வேண்டாம். நடுவுல சனி, ஞாயிறு வரும். திங்கள் போகலாம்!"

திவ்யா களைப்பில் படுத்ததும் உறங்கிவிட்டாள்.

மறுநாள் காலை தெளிந்துவிட்டாள். அம்மா காலை டிபனை கொண்டு வந்தாள். திவ்யா சாப்பிட்டாள்.

"எப்படி இருக்கே?" - அப்பா அருகில் வந்தார்.

"ஐயாம் ஆல் ரைட்!"

"பானு! அந்த வரன் ராத்திரி போன் பண்ணினாங்க! ரெண்டு வாரம் கழிச்சுக்கூட அவங்க பேசத் தயாரா இருக்காங்க! நம்மை விட்டுவிட அவங்களுக்கு மனசில்லை!"

திவ்யா பேசவில்லை!

"இந்த மாதிரி நல்ல வரன் தேடி வரும் போது விடக்கூடாது! திவ்யாவுக்குச் சொல்லு!"

"சரி நீங்க போங்க! அவ கேப்பா!"

அப்பா போய்விட்டார்.

திவ்யா எதுவும் பேசவில்லை. அம்மா சமையல் கட்டுக்குப் போய்விட, திவ்யா பாத்ரூமுக்குள் நுழைந்தாள்!

செல்போனை எடுத்தாள்!

"அத்தே! திவ்யா பேசறேன்!"

"எப்படீம்மா இருக்கே?"

"எனக்கு எந்த பிரச்னையும் இல்லையே? நல்லாத்தானே இருக்கேன்!"

"நீ உன் காதலைச் சொன்ன பிறகு, ராத்திரி நான் தூங்கலை. அதுவும் அரைகுறையா வேற சொல்லிட்டே! எனக்கு எதுவுமே புரியலை!"

"நான் உன் வீட்டுக்கே வர்றேன் அத்தே நாளைக்கு! எல்லாம் விவரமாச் சொல்றேன். ஆனா இவங்களும் விடறதா இல்லை. லண்டன் மாப்ளை எனக்காகக் காத்துக்கிட்டிருக்கான் அத்தே! பிரச்னை பெரிசாகும்னு தோணுது!"

"அப்ப உடைச்சிடு!"

"உங்கிட்ட பேசணும் அத்தே! முழுசா உன் ஆலோசனையும், ஆதரவும் எனக்கு வேணும். நான் இவங்ககிட்டப் பேச, எனக்கு நீ பக்கபலமா இருக்கணும்!"

"ஏண்டீ! என்ன துணிச்சல் உனக்கு? என் வயசென்ன? நான் உன் அம்மா மாதிரி! உன் காதலுக்கு என் ஆதரவைத் தேடறியா?"

"அத்தே! அம்மா, அப்பா, ஆசான், ஆண்டவன் எல்லாமே எனக்கு நீதானே?"

"சோப்பா?"

"நீ எப்படி வேணும்னாலும் நினைச்சுக்கோ! உண்மை அது தானே அத்தே!"

கங்கா நெகிழ்ந்துபோனாள்.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!