ஞாயிறு காலை ஏழு மணி! விஜய் எழுந்து விட்டான்!

அவளை வந்து எழுப்பினான்!

"ஏழுதானே ஆச்சு?"

"நாளை முதல் இந்த நேரத்துக்கு நீயும், நானும் வெளில கிளம்பணும்! அஞ்சு மணிக்கு எழுந்தாத்தான் வேலைக்கு ஆகும்! இப்பவே பழகிக்கோ! கம்மான்!"

எழுந்து பல் தேய்த்து, குளித்து, சாமிக்கு விளக்கேற்றுவதற்குள் மணி காலை ஒன்பதாகிவிட்டது!

"என்ன டிபன்?"

"இன்னிக்கு பூரி, உருளைக்கிழங்கு பண்ணிடு! இப்பவே அரிசி, உளுந்து ஊறப் போடு! இட்லி, தோசைதான் காலைல வேலைக்கு ஆகும்! ராத்திரி வந்து சப்பாத்தி செஞ்சுகலாம்!"

"மத்யானம் கேன்டீன்தானே?"

"வேண்டாம் தாரி! தினமும் ரெண்டு பேரும் வெளில சாப்பிட்டா உடம்புக்கும் பணத்துக்கும் கட்டாது! கலந்த சாதமா ஏதாவது எடுத்துட்டு போயிடலாம்! சரி! டிபனை ரெடி பண்ணு!"

அவள் உருளைக்கிழங்கு, வெங்காயத்தை ரெடி பண்ண, விஜய் ஆசீர்வாத் ஆட்டாவை எடுத்து தண்ணீர் ஊற்றி பிசையத் தொடங்கினான்!

"காய் வேகட்டும்! மசாலா ரெடியாகற வரைக்கும் மாவு ஊறும்!"

பிரமித்தாள்!

"என்ன அப்படி பாக்கற?"

"எல்லாம் தெரிஞ்சு வச்சிருக்கீங்களே?"

"ஆமாம்! அக்காவும் கல்யாணம் ஆகி போன பிறகு, நான்தான் அம்மாவுக்கு உதவி! அம்மா கொஞ்ச நாள் ஒடம்பு முடியாம படுத்திருந்தாங்க. அப்ப நான்தான் கூட மாட உதவி செஞ்சேன். அதுல ஓளரவு கத்துக்கிட்டேன்!"

"சமைக்கத்தெரியுமா?"

"சுமாரா! அடிப்படை அயிட்டங்கள் தெரியும்! எல்லாம் தெரியாது!"

காய்கள் வெந்ததும், அவள் மசாலா தயார் செய்ய, விஜய் பூரியை பரப்பத் தொடங்கினான்!

தாரிகா எண்ணெயில் பொரித்து எடுத்தாள். இருவரும் உட்கார்ந்து சூடாக சாப்பிட்டார்கள்!

"மசால்ல உப்பு கொஞ்சம் குறைச்சல்!"

"ஆமாம்!"

"சரி! மத்யான சாப்பாடு என்ன?"

"நீங்க சொல்லுங்க!"

"பருப்பு உருண்டை காரக் குழம்பு பண்ணி, கீரை மசியல் பண்ணிடு! அப்பளத்தை சுட்டுக்கலாம்! நான் உனக்கு ஹெல்ப் பண்றேன்!"

இருவரும் அருகிலுள்ள மார்க்கெட்டுக்கு சென்று கறி, காய்கள் வாங்கி வந்தார்கள்!

வீட்டுக்குத் தேவையான மளிகை சாமான்கள் ஏற்கெனவே இருந்தன!

"தாரி! சமையலை நீ கவனி! வீட்டை நான் க்ளீன் பண்றேன்!"

"சரிங்க!"

ஒவ்வொரு அறையையும் பார்த்து பார்த்து சீராக்கினான்!

வீட்டுக்குத் தேவையான எல்லா பொருட்களையும் ஏற்கெனவே வாங்கிப் போட்டிருந்தான்!

ஒரு குறையும் இல்லை!

பெரிய பதவியில் இருந்தாலும் ஒரு பந்தா இல்லை. ஆணாதிக்கம் இல்லை! எல்லா வேலைகளையும் தெரிந்து வைத்திருந்தான்! இறங்கி வேலை செய்தான்!

தாரிகாவுக்கு பார்க்க பிரமிப்பாக இருந்தது!

Sign up now to get the most out of Books2Read

Discover something great at Books2Read.

Thanks for signing up for Books2Read notifications!