இருந்த வேலை மும்முரத்தில் அன்று ஞாயிற்றுக்கிழமை என்பது கூட மறந்து போயிருந்தது ஸ்ரீஹரிக்கு.

மதிய உணவு வேளைக்கு மேலேயே ஆகிவிட்டிருக்க, உடனே மொபைலை எடுத்துத் தனது தாய்க்கு அழைத்திருந்தான்.

'இன்னும் வேலை முடியவில்லை, நான் வெளியில் சாப்பிட்டுக் கொள்கிறேன். எனக்காகக் காத்திருக்க வேண்டாமென்று' மீண்டுமொரு முறையும் சொல்லி விட்டுத் தான் வழக்கமாகச் சாப்பிடும் அருகிலிருக்கும் அந்த ஹோட்டலுக்குச் சென்று பசியாறிவிட்டு வந்தான்.

இடையில் இரண்டு முறை தங்கைக்கும் அழைத்துப் பேசினான்.

அவள் தனது தோழிகளுடன் வீடு சென்றுவிட்டதாகச் சொல்ல, மீண்டும் வேலையில் முழுகிப் போனான்.

அனைத்து முக்கியமான வேலைகளையும் முடித்துவிட்டவன், அந்த மாதத்தின் வரவு செலவைக் கணக்கிட்டுப் பார்த்தான்.

துல்லியமாகக் கணக்கிட்டுப் பார்த்தவனுக்கு வரவை விட, கூட செலவு பல மடங்கு அதிகமாகியிருந்தது தெரிந்தது.

ஒவ்வொரு மாதமும் ஒரு பெரிய தொகை துண்டு விழுந்து கொண்டே வருவதும்,

அதற்கும் தொழில் நல்லவிதமாகத்தான் போய்க்கொண்டிருந்தது.

ஸ்ரீஹரி நிர்வகித்துக் கொண்டிருக்கும் தொழில் நலிவடைய முடியுமா என்ன, அப்புறம் ஏன் இந்தப் பற்றாக்குறை.

வேறென்ன, ஒவ்வொரு மாதமும் புதிது புதிதாக குடும்ப நபர்கள் அனைவரும் போட்டி போட்டுக்கொண்டு இழுத்து வைக்கும் அதிகப்படியான செலவுகள்தானென்று மனம் உடனே சொன்னது.

இப்படியே போனால் பின்னர் குடும்ப நிலை,

இதற்கு என்ன தீர்வு,

நன்கு யோசித்துப் பார்த்ததில் குடும்ப நபர்கள் செய்யும் செலவுகளும் கூட அதிகப்படியானதோ, ஆடம்பரமானதோ இல்லையென்றுதான் தோன்றியது.

சிறு வயது முதலே செல்வச் செழிப்புடன் வளர்ந்துவிட்டவர்களுக்கு இப்போதைய குடும்ப, முக்கியமாகத் தொழில் நிலை புரிவது சற்று சிரமம்தான்.

ஒருவேளை எடுத்துச் சொன்னால் புரிந்து கொள்வார்களோ?

ஆனால் அதற்கும் ஸ்ரீஹரிக்கு மனம் வந்திருக்கவில்லை.

யாருடைய சந்தோஷத்தையும் குறைக்க அவனால் எப்படி முடியும், முக்கியமாகத் தம்பி தங்கையின் சந்தோஷத்தை.

அதிலும் இது அனுபவிக்கக் கூடிய வயதல்லவா. யோசிக்காமல் லட்சலட்சமாக செலவு செய்து கொண்டிருந்தவர்கள். இப்பொழுது சில ஆயிரத்திற்குக் கூடப் பலமுறை யோசித்த பிறகே தன்னைக் கேட்பது அவ னுக்கும் புரியாமல் இல்லையே,

அப்படியானால் இதற்கு என்னதான் தீர்வு,

சந்தேகமே இல்லை வரவை அதிகப்படுத்துவதுதான்.

அதற்காகத் தான் எவ்வளவு சிரமப்பட நேர்ந்தாலும் சரிதான்.

இப்பொழுதே பசி, உறக்கம் பாராது உழைத்துக்கொண்டுதானே இருக்கிறோமென்பதை அவனுடைய மனம் ஒப்புக்கொள்வதாக இல்லை.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!