வீட்டுக்குள் நுழைந்ததும் இரண்டாவது மகள் தாரா ஒரு பிடிபிடித்தாள்.

"ஏன்க்கா? நீயென்ன ஓவரா உதார் விடறே? அவங்க நாப்பது சவரன் போட்டு, எல்லாம் வாங்கித் தந்து கல்யாணத்தை நல்லாத்தான் நடத்தப் போறாங்க! நம்ம ரெண்டு பேர் கல்யாணம் அப்படியா நடந்தது?"

"ஏண்டீ? என்ன நடக்கலை உங்க ரெண்டு பேருக்கும்?"

"அம்மா! உங்களைக் குறை சொல்லவோ, குத்திக் காட்டவோ நான் வரலை! ஆளுக்கு 15 சவரன் போட்டு சுமாரா துணி மணி எடுத்து, நடுத்தரமான ஒரு மண்டபத்துல ரொம்ப ஆவரேஜா சாப்பாடு போட்டுத்தான் கல்யாணங்கள் நடந்தது! பிள்ளை விட்டார் பட்டியல் போட்டு குறைகாண ஏராளமான ஓட்டைகள் இருந்திருக்கு! அதை மறுக்காதே!"

"நிறுத்துடி! உங்கப்பாவுடைய ஒரு வருமானத்தை வச்சு நாங்க நடத்தினதே உசத்தி! பிரசாத் படிச்சுகிட்டிருந்தான். உதவிக்கு யாருமில்லை! கழுத்து வரைக்கும் கடன்! இந்த அளவுக்கு நடந்ததே பெரிசு!"

"ஒப்புக்கறேன்மா! 'எங்க மனசுல குறையில்லை! ஆனா நாங்க பெரிசா கிழிச்சோம்னு அங்கே பேசி, அவங்ககிட்ட கறக்கப் பாக்கறது என்ன நியாயம்?"

"யாரு கறக்கப் பாக்கறாங்க! நான் ஏதாவது கேட்டேனா?"

"இல்லை! அவரே நிறைவா செய்ய விரும்பறார். அழகா சரினு சொல்றதை விட்டுட்டு, எங்க வீட்டுக் கல்யாணம் இளவரசி டயானா கல்யாணத்தை விட உசத்தி'னு உதார் விடாதீங்க!"

அப்பா சிரித்து விட்டார்.

"ஒரு பொண்ணு வாழ வரும் போதே, புளுகு மூட்டைகளை அவிழ்த்து விட்டு பேரை ரிப்பேர் ஆக்கிடாதீங்க!"

குறுக்கே வந்தான் பிரசாத்!

"விடு தாராக்கா! இதெல்லாம் சராசரி குணம்! பெரிசு படுத்த வேண்டாம்!"

"தம்பி! அவங்க வீட்ல அர்ச்சனாவையும் சேர்த்து மூணு வருமானம். பணத்துக்கென்ன பஞ்சம்? இருந்தா செய்யறது கஷ்டமா என்ன?" - வத்சலா

"அக்கா! அவங்களுக்கு இன்னொரு பொண்ணும் இருக்கு!"

"அதுக்கும் சேர்த்து வச்சிருப்பாரே! சொந்த வீடு வேற பெரிசாவும் இருக்கு. நம்ம அப்பா பாவம்! சொந்தமா ஒரு வீடு கூட வாங்க முடியலியே!"

"பிரசாத் வாங்குவான்!" - தாரா சொல்ல...

"இவன் வாங்கினா, அர்ச்சனாதானே அனுபவிப்பா! நமக்கு என்ன கிடைக்கும்?"

வத்சலா பொசுங்க,

அப்பா முகம் மாறியது!

Sign up now to get the most out of Books2Read

Discover something great at Books2Read.

Thanks for signing up for Books2Read notifications!