அழகின் இலக்கணமாய்... அவ்வளவு நீள முடியுமாய்... துள்ளித் திரியும் மீன் விழிகளுமாய்... ஆப்பிள் கன்னத்தோடு... செப்பு உதடுமாய்... நல்ல கட்டான உடல் வாகோடு... கொடியிடையுடன் நல்ல நிறத்தில் இருந்தாள், திவ்யபிரியா.

அம்மாவிடம் கெஞ்சி, கூத்தாடி, அவர்களுக்கு அருகாமையில் உள்ள கல்லூரியிலேயே இடமும் வாங்கி விட்டாள்!

இன்றுதான் முதன் முதலாய் கல்லூரிக்குச் செல்கிறாள்!

அவளிடம் இருந்த நல்ல சுடிதாரில் ஒன்றை எடுத்து அணிந்து கொண்டாள். பட்டான கூந்தலை... தளரத் தளர ஒற்றைப் பின்னல் பின்னி... காதோரமாய் அழகிய ரோஜா ஒன்றை செருகி... அவள் கல்லூரிக்குச் சென்றது வானிலிருந்து இறங்கி வந்த நிலா கல்லூரிக்குப் புறப்படுவது போல இருந்தது!

மரகதம் பயந்து கொண்டு தான் அனுப்பினாள்.

"திவ்யா யாரிடமும் அநாவசியமாய் பேசக்கூடாது!"

"சரிம்மா!"

"முக்கியமா ஆண் பிள்ளைகள் பக்கமே திரும்பிப் பார்க்கக் கூடாது!"

"கட்டாயம், அம்மா!"

"அவர்கள் பேச வந்தாலும் நிமிர்ந்து பாராமல் சென்று விட வேண்டும்! நீ போவது படிக்க மட்டுமே! அது மட்டும் உன் நினைவில் இருக்க வேண்டும்!...

நம் குடும்பம் கஷ்டப்படுவது உனக்கு மனதில் இருக்க வேண்டும்...

பெண்களிடம் கூட அளந்தே பேசும்மா! ஒரு அளவோட நட்பு வச்சிக்கோ!...

ஜாக்கிரதைம்மா! உன் அப்பா இருந்தால் எனக்கு இவ்வளவு பயம் இருக்காது! தகப்பனில்லாமல் வளர்ந்த பிள்ளை தறுதலை அப்படின்னு சொல்லக்கூடாதும்மா!...

என்னோட பயத்தை புரிஞ்சிக்குவேன்னு நம்பறேன். ஏதாவது தப்பான பேச்சு என் காதில் விழுந்தால் கூட உன் படிப்பை நிறுத்திடுவேன். புரிஞ்சதா...?"

மரகதம் கடுமையான கண்டிப்புடன் கூற...

"அம்மா புரியுதும்மா! அநாவசியமா ஏன் பயந்து நடுங்கறே? நான் என்ன சின்னப் பிள்ளையா...? நல்லது எது? கெட்டது எது?ன்னு தெரியாமல் இருக்க."

அம்மாவுக்கு நம்பிக்கை வரும்படி தன்மையாய் திவ்யபிரியா கூறினாள்.

"சரிடி. பஸ்ஸுக்கு காசு இருக்கா?"

"பஸ்லயா...? வேண்டாம்மா. கூட்டம் ரொம்பி வழியும்! நான் நடந்தே போறேன்!"

"அவ்வளவு தூரம் நடந்து கஷ்டப்படணுமா?"

"தூரம் ஒண்ணும் அதிகமில்லேம்மா! அப்புறமாய் உனக்கு முடியும்போது சைக்கிள் மட்டும் வாங்கி தரீயா?"

மகள் கெஞ்ச...

"வாங்கி தரேம்மா. நீ படிப்பில் மட்டும் கவனம் செலுத்தினால்... பேங்கில இருக்க பணத்தில் கொஞ்சம் எடுத்து... உனக்கு சைக்கிள் வாங்கித் தரேன்!" அம்மா உருகினாள், பாசத்தில்!

"அதெல்லாம் வேணாம். அந்தப் பணம் முழுக்க உனக்குதான். ரெண்டு மூணு மாசம் உன்னோட காலை மாலை வேலை செய்யறேன். அதிகப்படியான வருமானம் வந்தால் வாங்கிக் கொடும்மா! நான் வரேம்மா!"

புத்தகத்தை எடுத்துக் கொண்டு திவ்யா கிளம்பவும்...

மகளின் அழகைக் கண்டு தாயின் வயிற்றில் பயப்புயல் மேலெழுந்து அச்சமூட்டியது.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!