"அம்மா... அம்மா..."

பள்ளிக்கூடம் செல்ல மகனைத் தயார் பண்ணிக்கொண்டு இருந்த பார்வதி, வாசலில் குரல் கேட்டு,வெளியில் வந்தாள்.

தலை முழுவதும் வெள்ளிக்கம்பியாக நரைத்துப் போன ஒரு கிழவர் நின்று கொண்டு இருந்தார்.

அவர் தூய்மையான ஆடைகள் அணிந்து இருந்தார். தோளில் ஒரு துண்டு கிடந்தது.

அவருக்குப் பக்கத்தில் ஒரு சிறுமி நின்று கொண்டு இருந்தாள்.

அவளுக்கு ஏழு - எட்டு வயது இருக்கும். நல்ல பொன்னிறம். தங்கத்தில் செய்த சிலை போல இருந்தாள். அந்தக் காலை வெயிலில் அவளுடைய பொன் மேனி தகதக என்று மின்னியது. "மூக்கும் முழியும்" தங்கத்தில் பதித்த வைரங்களைப் போல இருந்தன. நல்ல பட்டுப் பாவாடை - சட்டை. குட்டி "கிளியோ பாட்ரா" என்று கூறலாம்!

அவள் எவ்வளவு அழகாக இருந்தாளோ, அவ்வளவு குழப்பம் அவள் முகத்தில் காணப்பட்டது. அவள் கண்களில் ஒருவகைக் கலவரம். மருட்சியுண்ட மான்குட்டி போல அவள் காணப்பட்டாள்.

மதிப்பில் உயர்ந்தவர்களாக அவர்கள் காணப்படவே, "நீங்கள் யார்? யாரைப் பார்க்க வேண்டும்?" என்று பார்வதி கேட்டாள்.

அவளைப் பார்த்ததுமே அந்தக் கிழவரின் முகம் மலர்ந்தது.

"நீங்கள்தானே பார்வதி?" என்று நம்பிக்கையுடன் கேட்டார்.

"ஆமாம்" என்றாள், பார்வதி, சிறிது குழப்பத்துடன். ஏனென்றால், அந்தக் கிழவர் யார் என்று அவளுக்குத் தெரியவில்லை.

"நான் உங்களைத்தான் பார்க்க வந்தேன்" என்றார், அந்தக் கிழவர்.

பார்வதிக்குத் திகைப்பாக இருந்தது.

"நீங்கள் யார்?" என்று கேட்க நினைத்தவள், அப்படிக் கேட்பது நாகரிகமாக இருக்காது என்று நினைத்து, "உள்ளே வாருங்கள்" என்றாள்.

சிறுமியையும் அழைத்துக்கொண்டு கிழவர் வீட்டுக்குள் வந்தார்.

"உட்காருங்கள்" பார்வதி மரியாதைக்காகச் சொன்னாள். உட்கார்ந்து கொண்டே கிழவர் வீட்டை ஒரு நோட்டம் விட்டார்.

கொஞ்சம் வசதியான குடும்பம் என்பது வீட்டைப் பார்த்தாலே தெரிந்தது.

கிழவரின் முகத்தில் ஒரு திருப்தி. சிறுமியைத் தட்டிக் கொடுத்தார்.

"நீங்கள் யார் என்று தெரியவில்லையே?" பார்வதி சொற்களை மென்று விழுங்கினாள்.

"நான் கொழும்பில் இருந்து வந்திருக்கிறேன்" என்ற கிழவர், "இந்தக் குழந்தையை உங்களுக்குத் தெரிகிறதா?" என்று கேட்டார்.

பார்வதிக்கு வியப்பாக இருந்தது.

சிறுமியை விழித்து நோக்கினாள்.

சிறுமியும் அவளையே பார்த்தாள்.

"தெரியாது என்று சொல்லி விடுவார்களோ" என்ற அச்சம் அவளுடைய சின்னஞ்சிறு விழிகளில் பிரதிபலித்தது!

Sign up now to get the most out of Books2Read

Discover something great at Books2Read.

Thanks for signing up for Books2Read notifications!