உயர் போலீஸ் அதிகாரிக்கு முன்னால் விறைப்பாக நின்று சல்யூட் அடித்தார் டிஎஸ்பி சரண்!

"உங்க தலைமைல தனி போலீஸ் படை அமைச்சு உடனடியா புறப்படுங்க!"

"சொல்லுங்க சார்!"

"இங்கிருந்து நம்ம தமிழ்ப் பெண்கள் பலர் கடத்தப்பட்டு விபச்சாரத்துல ஈடுபடுத்தப் படறாங்க! அவங்களை மீட்கணும். புறப்படுங்க சரண்!"

"அது பிரபலமான சிவப்பு விளக்குப் பகுதியாச்சே சார். ஊடுருவி உள்ளே நுழைய முடியுமா?"

"மும்பை காவல்துறையும் இதுக்கு நமக்கு உதவும். நம்ம தமிழர் ஒருத்தர் அங்கே செல்வாக்கோட இருக்கார். அவரை நீங்க போய்ப் பாருங்க! உதவுவார்!"

"சரி சார்!"

சரண் வெளியே வந்து விட்டான்.

தன் அறைக்கு வந்து பரபரவெனத் தன்னுடன் வரப்போகும் போலீஸ் அதிகாரிகளின் பட்டியலைத் தயார் செய்தான். அவர்களை வரவழைத்து தனது திட்டத்தை விளக்கத் தொடங்கினான். "இன்னிக்கு ராத்திரியே புறப்படறோம்."

"சரி சார்!"

சரண் இந்த முப்பது வயதுக்குள் காவல்துறையில் பிரமிக்கும் அளவுக்கு ஒரு சில சாதனைகளை நிகழ்த்தி விட்டான்.

காக்கிச் சட்டைக்குள் புகுந்து விட்டால் கரடு முரடானவன். மற்றபடி ஈரமான இதயத்துக்கு சொந்தக்காரன்!

சட்டம், ஒழுங்கு குலையாத ஒரு சமுதாயத்தை உருவாக்குவதில் தன் பங்கு மிகப்பெரிதாக இருக்க வேண்டும் என நினைப்பவன்!

இரவு புறப்பட வேண்டும்.

தயார் செய்து கொள்ள வீட்டுக்கு வந்து விட்டான். அம்மா ஓடி வந்தாள். உள்ளூரில் இருக்கும் கல்யாணமான அக்கா வந்திருந்தாள்.

"தம்பி! தரகர் வந்தார். ஒரு ஜாதகம் தந்தார். பிரமாதமா பொருந்தியிருக்கு. பெண் வக்கீலா இருக்கா! அழகா இருக்கா! உனக்கு தொழிலுக்கும் பொருத்தமானவள்!"

சரண் பேச வில்லை.

"நீ சரினு சொல்லிட்டா, நாளை நல்ல நாள்... அந்தப் பெண்ணைப் பாத்துட்டு வந்துடலாம்!"

"இல்லைம்மா! இன்னிக்கு ராத்திரி ட்யூட்டில மும்பைக்குப் புறப்படறேன் நான்!"

"எப்ப வருவே?"

"அது வேலை முடியறதைப் பொறுத்த சங்கதி!"

"சரி! போட்டோ பாக்கறியா?"

"அம்மா! இப்ப கல்யாணம் அவசரமா?"

அக்கா குறுக்கிட்டாள். "முப்பதுல நடக்காம, அறுவதுல நடந்தா நல்லாருக்குமா சரண்?"

சரண் சிரித்து விட்டான்.

"அப்பத்தான் போலீஸ்காரனுக்கு ஓய்வு!"

அக்காவும், தம்பியும் சேர்ந்து சிரித்தார்கள்.

"நான் சாகறதுக்குள்ளே என் பேரனப் பாக்க மாட்டேனா?"

"அக்கா பையனப் பாத்துக்கோ! அம்மா! இப்ப அவசரப்படாதே! நான் மும்பையிலிருந்து திரும்பின பிறகு இதைப் பற்றிப் பேசலாம்! பல பேரோட வாழ்க்கையை வெளிச்சத்துக்குக் கொண்டு வர்ற உன்னத பணி ஒப்படைக்கப் பட்டிருக்கு! வரட்டுமா?"

மாலை புறப்பட்டு விட்டான்.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!