லயாவின் மன வருத்தத்தைப் போக்கி, மனதைத் திசை திருப்பும் வகையில் சந்தர்ப்பம் அமைந்தது.

ஆம்...! ஸ்ருதிலயா துவங்கிப் பத்தாண்டுகள் நிறைவு பெற்றதை அடுத்து, தீனா அதைப் பெரிய அளவில் கொண்டாட ஏற்பாடு செய்திருந்தான்.

அது... மனதிற்கு ஒரு புத்துணர்வை மற்றும் மகிழ்ச்சியைத் தருவதோடு, வியாபார நோக்கிலும் ஒரு பெரிய விளம்பரமாக அமையும் என்பது தீனாவின் கணிப்பு.

அதையொட்டி ஏராளமான நோட்டீஸ் வீடு வீடாகப் போய் விநியோகித்ததோடு, தள்ளுபடி விற்பனையும் அறிவித்திருந்தார்கள்.

இதையெல்லாம் செய்து விட்டு... கடை அழுது வடிந்து கொண்டிருப்பதா என்று, அங்கு பணிபுரியும் பணியாளர்கள் அனைவரிடமும் வெவ்வேறு வேலைகளை ஒப்படைத்துக் கடையை அழகுபடுத்தச் சொல்லியிருந்தான்.

கடை துவங்கிய தினமான ஜூலை ஒன்றாம் தேதியன்று சிறிய விழா போன்று ஏற்பாடு செய்திருந்தான்.

வந்தவர்களை உபசரித்து அமர வைத்துக் கொண்டிருந்தவள்... சற்றே தலையில் ஆங்காங்கே வெள்ளிக் கம்பிகள் போன்று நரை முடி ஓடினாலும், முகத்தில் கம்பீரம் குலையாது இளமையைக் காட்ட, சரிகை வேலைப்பாடுகள், உயர்ந்த தரத்தைச் சொல்லும் அதே சமயம்...

கம்பீரத்தைக் கொடுக்கக்கூடிய காட்டன் புடவையில் படுபாந்தமாய்த் தெரிந்த அந்த அம்மாளை உபசரித்து, குளிர் பானத்தை அவர் கைகளில் கொடுத்துவிட்டு நிமிர்ந்தவள், தன் கண்களைத் தானே நம்ப முடியாது நின்றாள்.

இவன்... ஜெய்... ஜெய்... உள்மனம் கூவத் துவங்கியது.

அவள் கண்கள் தாமாகத் தாமரை மலர்கள் போன்று மலர்ந்து விரிந்து அகன்றதை அவளாலேயே உணர முடிந்தது.

பாகம் படபடவெனக் கண் இமைகள் கொட்டின.

"ஏன்...? எனக்குக் குளிர்பானமில்லையா...?" என்று கேட்டவாறு இவள் அருகில் வந்ததும், இவள் பேசத் திராணியற்றுச் சிலையானாள்.

"லயா...!" - மெல்ல... இவளுக்குப் பெயரிட்டவன், இவளை அழைத்து...

"லயா! பேச மாட்டாயா? இப்படிப் பேசா மடந்தையாயிருந்தால், பெண் என எண்ணாமல், சிலை என்று எண்ணிவிடப் போகிறார்கள்!" என்றவன், சிறிது இடைவெளி விட்டு...

"சிலை என்று எண்ணுவதோடு... தொட்டுப் பார்த்து விடவும் துணிந்து விடுவார்கள்!" என்றவாறு இவளைத் தொட வர...

"ஜெய்... இதென்ன விளையாட்டு? எனக்கு உங்க மேலே கோபம். சொல்லாமல் கொள்ளாமல் போயிட்டீங்கல்ல...!" என்று அவனுக்கு மட்டுமே கேட்குமாறு உரைத்தவள், அவள் அழைக்கப்படவும் வேறுபுறம் நழுவி நகர்ந்து விட்டாள்.

அவன் வந்திருக்கிறான் என்றதுமே... அதற்குப் பின்பு அடிக்கடி அவள் கண்கள், அவன் இருப்பிடம் தேடியலைந்து... அவன் இருப்பை ஊர்ஜிதப்படுத்திக் கொண்டு திருப்திப்பட்டுக் கொண்டன

Sign up now to get the most out of Books2Read

Discover something great at Books2Read.

Thanks for signing up for Books2Read notifications!