"என்ன கதிர், பணத்தேவையா?"

"அதெல்லாம் ஒண்ணுமில்ல பாட்டி" என்ற பேரனைத் தொடர்ந்து

"அப்பிடியெல்லாம் எதுவுமில்ல அத்தெ நாந்தான் கதிர்கிட்ட சும்மா கேட்டிருந்தேன்" என்றிருந்தார் இந்துமதி.

தொடர்ந்து தாத்தா ஷண்முகமும் "என்ன விஷயம் கதிர்?" என்று கேட்டுக் கொண்டே வர பாட்டியிடம் சொன்னதையே அவரிடமும் சொல்லியிருந்தார்.

"தொழில் நல்லவிதமா செய்யப் பாரு கதிர். அதுக்காக எவ்வளவு பணம் தேவப்பட்டாலும் தோட்டத்த வித்துக் குடுக்கக்கூட நான் தயங்க மாட்டேன்" என்ற தாத்தாவின் வார்த்தைகளில் "என்ன தாத்தா நீங்க, வேணும்னா நானே கேக்கறேன். ஆனா நீங்க சொல்றதுக்கெல்லாம் அவசியமே வராது" என்றிருந்தான்.

"வந்தாலும் தப்பில்லேங்கறேன். காலம் மாற மாற மாற்றங்களுக்கும் நாம தயாரா இருக்கணும் கதிர்.

தேவைக்குதான் சொத்தெல்லாம், அதுக்காக நாம இல்லப்பா."

"சரிதான் தாத்தா."

"அதோட பணமாவும் பேங்க்ல இருக்கு கதிர்" என்ற தாத்தாவிடம் "அது எவ்வளவு தாத்தா?" என்று கேட்டிருந்தாள் தீபிகா.

தாத்தா சொல்ல "அவ்வளவா?!" என்று வாயைப் பிளந்தாள்.

"எல்லாருமே அண்ணனுக்குதான் குடுப்பீங்களா? எனக்கு எதுவுமே இல்லையா?" என்ற மகளின் தலையில் செல்லமாக கொட்டியிருந்தார் இந்துமதி.

"ஏம்மா, ஏன் கொட்றீங்க?"

"உங்கண்ணா வேண்டாம்னு சொன்னதால கேக்கறோம், உங்கிட்டக் கேட்டா எல்லாமே வேணும்னு கேப்பியே."

"ஓ, அப்ப அண்ணா வேண்டாம்னு சொல்வார்னு தான் திரும்பத் திரும்ப கேக்கறீங்களா? வேணும்னு சொன்னாக் குடுக்க மாட்டீங்களா? என்ன அப்படித் தானே அதுதானே உண்மை " என்று ஆவலுடன் கேட்டிருந்தாள்.

"அப்படியெல்லாம் இல்லடி தங்கமே, அதே உரிமை உனக்கும் இருக்கு, சொல்லு உனக்கென்ன வேணும்?"

"எனக்கென்ன காலேஜ் போகப் போறேன், ஒரு நாப்பது அம்பது ஸெட் புது டிரஸ் எடுத்தாப் போதும் பாட்டி..."

"அப்புறம் நான் மட்டும் என்னவாம்?" என்று கிருத்தி வர "உனக்கு எத்தன ஸெட் டிரஸ் வேணும் கண்ணப்பா?" என்று கேட்டிருந்தார் பாட்டி.

"எனக்கு ஒரு பத்து ஸெட் போதும் பாட்டி. ஆனா என்ன விலதான் இவளோட பத்து ஸெட் என்னோட ஒரு ஸெட் டிரஸ்க்கு சமமா இருக்கும்."

"அப்ப நூறு ஸெட்டா?" என்று தீபிகா சண்டைக்கு வர, "ஏன் உனக்கென்ன வந்தது நீயும் வேணும்னா எடுத்துக்கோ" என்றிருந்தான் கிருத்திக்.

"ஆனாலும் மனசாட்சின்னு ஒன்னு இல்லையா?"

"உனக்கிருக்கா முதல்ல, அதப்பத்தி நீ ஏன் பேசற?"

"போதும் வாலுங்களா, பெரியவங்க பேசிட்டிருக்காங்கள்ல போங்க இங்கிருந்து" என்று தன் மக்களை செல்லமாக அதட்டியிருந்த இந்துமதி, "நாம போய் நைட் டிஃபன் வேலயப் பாக்கலாம் அத்தெ வாங்க" என்று மாமியாருடன் சமயலறைக்கு வந்திருந்தார்.

தாத்தாவும் பேரனும் மும்முரமாக தொழில் சம்பந்தமாக பேசிக் கொண்டிருந்தனர்.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!