மீராவை இன்றைக்கு சற்றேறக்குறைய 63 தினங்களுக்கு முன்னால் 'ஆனந்த் யார்?' என்று கேட்டிருந்தால் 'தெரியாது' என்று பதில் சொல்லியிருப்பாள். இன்று ஆனந்த் அவள் கணவன்.

சொர்க்கத்தில் நிச்சயிக்கப்படாத உபரியான பல இந்தியத் திருமணங்கள் சுமங்கலி'யிலும் 'ஹிண்டு' வின் ஞாயிற்றுக் கிழமை விளம்பரங்களிலும் நிச்சயிக்கப்படுகின்றன. சுமங்கலி ஜூன் எண்பத் தேழு இதழுக்கு சென்னையில் ஒரு வங்கியில் டிமாண்டு டிராப்ட்டாக ரூபாய் அம்பது அனுப்பி விளம்பரம் செய்து வெளிவந்த ஒரு வாரத்துக்குள் ஜபல்பூரிலிருந்து ஒரு இன்லண்டு லெட்டர் வந்தது. ஆனந்தின் அப்பா எழுதியிருந்தார்.

பையன் மைலாப்பூரில் லஸ் கார்னர் அருகில் முருடீஸ் லாட்ஜுக்கு அடுத்த கட்டடத்தில் மேல் மாடியில் தனி ரூமில் இருக்கிறான். அவனை நேரில் சந்தித்து பெண்ணைக் காட்டி, அவன் சம்மதித்து விட்டால், நாங்கள் வந்து கல்யாணம் பார்க்கிறோம் என்று எழுதியிருந்தார்.

மீராவின் அப்பா சுந்தரமூர்த்தி உடனே மயிலாப்பூர் போக, அந்தப் பையன் ஆஸ்பெஸ்டாஸ் கூரை போட்ட மாடி அறையில் தலை வாரிக் கொண்டிருந்தவன் உடனடியாக வந்து பெண் பார்க்கிறேன் என்றான். சுந்தரமூர்த்திதான் நாள் நன்றாக இல்லை என்று வெள்ளிக்கிழமை பெண் பார்க்க ஏற்பாடு செய்துவிட்டு வந்தார்.

பையன் பி.காம்., ஏ.ஸி.ஏ., என்றும், சர்க்கார்வசமான பாங்கில் ப்ரோபேஷனரிஆபீசர் என்றும், நல்ல குடும்பத்தைச் சேர்ந்தவன் என்பதும் தெரிந்தது.

வெள்ளிக் கிழமை ஆனந்த் பெண் பார்க்க வந்தபோது, மீராவின் தங்கையை மீரா என்று எண்ணிக்கொண்டு, 'மிஸ், உங்ககூட ஒரு நிமிஷம் பேசலாமா!' என்றான்.

அதற்கு அவள், 'தாராளமா' என்றாள்.

பிழை திருத்தம் முடிந்து மீராவை 'தனியாக' பால்கனிக்கு அழைத்துச் சென்றபோது, அவள் தம்பி தங்கைகள் அடைகாக்க, ஜன்னல் வழியாக மீராவின் பாட்டி பார்த்துக்கொண்டிருக்க, தமாஷாக நிகழ்ந்தது அந்த உரையாடல்.

'உங்களுக்கு என்னைப் பிடிச்சிருக்கா... ரொம்ப... இந்த வருஷம் வெயிலா?... இல்லை!... நீங்க எந்த காலேஜ்? நான் லயோலா, அப்பறம் விவேகானந்தா...

இவ்வாறு பற்பல கேள்விகளுக்குப் பின் மீரா இறுத்த ஒரே பதில் 'உங்க காலர்ல கட்டெறும்பு ஊர்றது.'

ஆனந்த் இவ்வாறு பெண் பார்த்துவிட்டுப் போனதும் மீராவை, 'எப்படி பையன்?' என்று கேட்க, 'எல்லாரையும் போலத்தான் இருக்கான் அம்மா' என்றாள். (குறித்துக் கொள்ளவும் - காதல் கீதல் என்று ஏதும் இல்லை.)

'இருக்'கான்'னு சொல்லாதடி, இருக்'கார்'னு சொல்லு!'

'இன்னும் கல்யாணம் ஆகலையே!'

'பிடிச்சிருக்கா, இல்லையா, சொல்லேன்!'

'சொல்லத் தெரியலையேப்பா.'

'குழந்தையை இப்படிக் கேட்கக்கூடாதுடா. அவளுக்கு பிடிச்சுத்தான் இருக்கு. கண்லயே கண்டுபிடிச்சுட்டேன்!'

'பாட்டி, நீயா கல்யாணம் பண்ணிக்கப் போறே' என்று மீராவின்' தங்கை ரமா சொல்ல,

'ரமா, நீ சொல்லு, எப்படி இருக்கான்?'

'பரவால்லை. கண்ணுதான் லேசா மாறுகண் மாதிரி இல்லை?'

'அப்படி இருந்தா நல்ல அதிர்ஷ்டம்னு சொல்வா.'

'எனக்குப் பிடிக்கலை. அந்தாளு திருதிருன்னு முழிக்கிறான்' என்றான் சந்து.

'சே, சாதுடா அவர். ஒரு வாரத்தில் மீரா வழிக்கு கொண்டு வந்துருவா பாருங்கோ.'

'இப்பவே 'வழிக்குக் கொண்டுவரதை' பத்தி பேசு' என்றார் சுந்தரமூர்த்தி.

மீராவின் குடும்பம் ஏராளமான சந்தோஷமான குடும்பம். சுந்தரமூர்த்தி குழந்தைகளைக் கணக்கு வைத்துக்கொள்ள அவகாசம் இல்லாமல் ஆபீஸ் வேலையாக அலைந்தார். அம்மா, தாத்தா, பாட்டி, தம்பிமார்கள், வீணாய்ப்போன ஒன்றுவிட்ட அத்தை என்று அல்லோலகல்லோலமாக இருக்கும் வீடு. பேருக்குப் பேர் டிவி போடுவார்கள். தலை வாரிக்கொள்வார்கள். சினிமா போவார்கள். சினிமாவிலிருந்து வருவார்கள். குழந்தைகள் குறுக்கே ஓடும். பால் சாப்பிடும். தர்மஸ்தலா மாதிரி பந்தி பந்தியாக சாப்பிட்டுக்கொண்டே இருப்பார்கள்.

இந்தச் சூழ்நிலையில் மீரா முதலிரவு, சாந்தி கல்யாணம் போன்ற விஷயங்களில் எல்லாம் அதிக ஞானம் பெற வாய்ப்பில்லாமல் வளர்ந்து விட்டாள். வருஷத்துக்கு மூன்று படம்தான் பார்ப்பாள். அதுவும் சவுண்ட் ஆஃப் மியூஸிக், ரஷ்யன் சர்க்கஸ், சார்லி சாப்ளின் போன்ற உபத்திரவம் இல்லாத படங்கள்தான் பார்த்திருக்கிறாள். டிவி மிகமிக தணிக்கை.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!