விட்டெறிந்த கல் போல விர்ரென்று மேல் எழுப்பிக் கிளம்பியது விமானம்!

உழைப்பவன் உயர முடியும் என்ற உண்மையை உறுதிப்படுத்துவது போல இருந்தது, அதன் ஓட்டம்.

மற்ற வண்டி வாகனங்களைப் போல இந்த விமானத்தின் ஓட்டமும் முதலில் தரையில்தான் தொடங்கியது. ஓடி ஓடி, காற்றைக் கிழித்துக் கொண்டு பாய்ந்து செல்லும் அம்பு போல, மேலே சென்று, நீலக் கட்டிலில் நீந்தும் மாபெரும் கப்பல் போல, கோலவானில் விமானம் மிதக்கத் தொடங்கியது.

கிளம்பிய போது சற்று குலுக்கல் இருந்தது. இப்பொழுது, மழை நீரில் சிறுவர்கள் செய்துவிட்ட காகிதக் கப்பல் போல, அமைதியாகச் சென்று கொண்டு இருந்தது.

இருக்கைகளுடன் சேர்த்துத் தங்களைப் பிணைத்திருந்த பயணிகள், "பெல்டு" களை அவிழ்ப்பதற்கான அறிவிப்பு எப்பொழுது வரும் என்று காத்துக் கொண்டு இருந்தார்கள்.

விமானம் சீராகப் பறக்கத் தொடங்கியதும், ஒலிபெருக்கியில் இனிய குயில் குரல் கேட்டது.

"புகை பிடிக்காதீர்" என்ற அறிவிப்புடன் பயணிகளுக்கு நேராக எரிந்து கொண்டு இருந்த சிவப்பு விளக்கும் அணைந்தது.

விடுதலை அடைந்த மகிழ்ச்சியுடன் பயணிகள் "பெல்டு"களில் இருந்து தங்களை விடுவித்துக் கொண்டார்கள்.

ஒரு நெருக்கடியான நிலையில் இருந்து இயல்பான வழக்கமான வாழ்க்கைக்குத் திரும்பிய உற்சாகம் அவர்களிடம் காணப்பட்டது.

பெல்டடை அவிழ்ப்பதற்கு ஒரு சிறுவனுக்கு விமானப் பணிப் பெண் ஒருத்தி உதவி செய்தாள்.

சில பெண்களுக்கும் விமானப் பணிப் பெண்களின் உதவி தேவைப்பட்டது.

காதுகளில் பஞ்சு அடைத்து இருந்தவர்கள், அதை எடுத்து எதிரில் இருந்த பையில் போட்டார்கள்.

விமானம் இப்பொழுது எத்தனை அடி உயரத்தில் பறந்து கொண்டு இருக்கிறது என்பதை ஒலிபெருக்கியில் அறிவித்தார்கள்.

பயணிகள் பேசிக் கொள்வதும், பத்திரிகை படிப்பதுமாக நேரத்தைக் கழிக்கத் தொடங்கினார்கள். சிலர் சிகரெட்டுகளைப் பற்ற வைத்துக் கொண்டார்கள்.

சன்னல் ஓரமாக அமர்ந்து இருந்த பயணிகள் வெளியில் பார்ப்பதில் ஆவல் காட்டினார்கள்.

பஸ், ரெயில்களில் மட்டும் அல்ல; விமானத்திலும் சன்னல் ஓரமாக அமர்ந்து கொள்வதில் யாருக்கும் ஓர் ஆசை.

நான்கு இருக்கைகள் சேர்ந்தது ஒரு வரிசை. எனவே, நாலில் ஒருவர்தான் சன்னல் ஓரமாக அமரும் அதிர்ஷ்டம் பெற்றவர்.

ரெயிலிலோ பஸ்சிலோ ஓடிப் போய் இடம் பிடிப்பது போல விமானத்தில் முடியாது. திரைப்பட அரங்குகளில் மேல் வகுப்பு டிக்கெட்டு வாங்கும்பொழுது, டிக்கெட்டிலேயே நாம் அமர வேண்டிய இருக்கை எண்ணை குறிப்பிட்டு விடுவது போல, விமானத்தில் ஏறும்பொழுதே இருக்கை எண்ணை குறித்துக் கொடுத்து விடுவார்கள். யாருக்கு லாட்டரி அடிக்கிறதோ அவர் சன்னல் ஓரமாக அமர்ந்து கொள்ளலாம்.

அத்தகைய அதிர்ஷ்சாடலிகளில் ஒருவன் – சரவணன்.

சன்னல் ஓரமாக அமர்ந்து இருந்த அவன், வெளியில் பார்த்துக் கொண்டே வந்தான்.

நீலக்கடல் அவனுக்கு நன்றாகத் தெரிந்தது.

கீழேயிருந்து மேலே பார்த்தால், நீலவானம்.

மேலேயிருந்து கீழே பார்த்தால், நீலக்கடல்.

மண்ணும் நீலம்!

விண்ணும் நீலம்!

எவ்வளவு விசித்திரம்!

விமானத்தில் இருந்து பார்க்க, அலைகடல் வானக் கடல் போல அமைதியாகத் தெரிந்தது.

வானத்தில் மின்னும் நட்சத்திரக் கூட்டம் போல, கதிரவனின் ஒளிக்கற்றை கடலில் எதிரொலித்தது.

வங்கக்கடல், அது.

சிங்கப்பூரில் இருந்து சென்னையை நோக்கி அந்த விமானம் வந்து கொண்டே இருந்தது.

"ஏர் இந்தியா" நிறுவனத்துக்குச் சொந்தமான "ஏ ஐ 411" என்ற எண் கொண்ட ஜெட் விமானம், அது.

வெளியில் இருந்து பார்க்கத்தான் விமானம், உள்ளேயோ, நவீன முறையில் கட்டப்பட்ட ஒரு திரை அரங்கு போலத் தோற்றம் அளித்தது.

பளிங்குக் கல்லிலே கட்டப்பட்ட தாஜ்மகாலையும், பல வண்ணங்களைக் குழைத்துத் தீட்டப்பட்ட அஜந்தாவையும் நினைவுபடுத்துவதாக விமானத்தின் உட்புறம் விளங்கியது

Sign up now to get the most out of Books2Read

Discover something great at Books2Read.

Thanks for signing up for Books2Read notifications!