எதிர்பாராமல் ஏற்படும் தாக்குதலால் மனம் குழம்பி, மூளை செயலற்று போகுமே, அது போல உறைந்து போனாள் வாசவி.

தேவலோகத்து இந்திரன் போன்ற அழகிய தோற்றம், நல்ல உயரமும், கம்பீரமான உடற்கட்டும், படிய வாரப்பட்ட தலையும், குமிழ் சிரிப்பும், இந்தியாவின் பிரபல ஆண் மாடல்களில் ஒருவரான ஜான் ஆபிரகாமை நினைவூட்டியது.

அதுவரை சலனமே இல்லாத மனக்குளத்தில் சிறு கல் விழுந்து ஏற்பட்ட உணர்வு மிக இதமான அதே சமயம் வினோதமாக இருந்தது.

காந்தம் போல சுண்டியிழுத்த அவன் கரிய விழிகள் ஊசி போல இதயத்தில் தாக்கம் ஏற்படுத்த, முதல் பார்வையிலேயே மனம் கொள்ளை போனது.

இதுவரை அடைத்து வைக்கப்பட்டு இருந்த இதயக்கதவு இவனை பார்த்த நொடியே சட்டென்று அகல திறப்பது போல...

எதிரில் இருந்த ரிஷிநந்தனும் அதே நிலையில் இருந்தான் போல...

பார்வைகளின் வீர்யத்தில், உடலில் மின்சாரம் பாய, சட்டென்று திவ்யா கைகளை அழுத்தவும், திடுக்கிட்டு சுதாரித்தவள் பின் மீண்டாள்.

ஆனால் யாரிவன்? எதற்காக தன்னிடம் பேச நினைக்கிறான் என்ற கேள்வி, அவள் கண்களில் தொக்கி நின்றது.

"ஹலோ! என்ன விஷயம் மிஸ்டர்?"

"நான் ரிஷிநந்தன்..." என்றான் புன்னகையுடன்.

"அழகான பெயர் தான்" என்று உள்ளம் பாராட்ட, உதடுகளோ வீம்புடன்.

"அதுக்கென்ன இப்ப?" என்றது.

ஒரு கணம் அவளை கூர்மையாக பார்த்தவன், பின் மீண்டும் சிரிக்க, இப்பொழுது எரிச்சலடைந்தவள்,

"மிஸ்டர்! நான் எதுவும் ஜோக் சொல்லலியே! இப்படி நீங்க 'ஈ'ன்னு இளிக்க..." என்றதும், திவ்யாவும் முகத்தில் கடுப்புடன்,

"மிஸ்டர்! வழியை விடுங்க. நான் போகணும்" என்று சொல்ல, இப்பொழுது குறுக்கிடுவது ரிஷிநந்தனின் நண்பன் ஷிவேந்தரின் முறையானது.

"ஹலோ. மிஸ்... ஓ... சாரி இரண்டு பேர் இருக்கறதால பன்மையில் சொல்லணுமே... மிஸ்களா? என்ன பண்றீங்க இங்கே?"

"ம்! பார்த்தா தெரியலையா மிஸ்டர்..." என்று திவ்யா எகிற.

"ஹலோ! என் பேரு ஷிவேந்தர், ஷிவான்னு கூப்பிடுவாங்க."

"என்ன இரண்டு பேருமா வம்பிழுக்கறீங்க? ஐ வில் கால் தி போலீஸ். சரியான லூசுங்க போல சவி" என்று திவ்யா எரிச்சலுடன் மொழிய.

"கூப்பிடுங்க சிஸ்டர் போலீசை" என்று ரிஷிநந்தன் அமைதியாக சொல்ல, இரு பெண்களும் அவர்களை குழப்பமாக பார்க்க,

"இருடா ரிஷி" என்ற ஷிவேந்தர்,

"மிஸ்! வண்டியில் என்ன ப்ராப்ளம்?" என்றதும்,

"இட் இஸ் நன் ஆஃப் யுவர் பிஸினஸ்" என்று வாசவி வெடுவெடுக்க,

"மேடமோட சொந்த ஊர் சிவகாசி போல" என்று ரிஷி சிரிக்க, வாசவியோ உச்சபட்ச டென்ஷனில் சாவியை அதன் துவாரத்தில் சொருக,

"மேடம்! ஒரு நிமிஷம்... இந்த சாவியை வேணா போட்டு பாருங்களேன் ப்ளீஸ்..." என்று ரிஷிநந்தன் சொல்ல, முதலில் தயங்கியவள், பிறகு வாங்கி அதை கீ ஹோலில் நுழைக்க, லாக் ரிலீசானது.

இப்பொழுது விழித்து நின்றது வாசவியும், திவ்யாவும்.

அப்படி என்றால்... இந்த வண்டி... என்று யோசிக்கும் போதுதான் உறைத்தது.

பதட்டத்துடன் வண்டியை உற்று பார்க்க, பிறகே அது அவளின் வண்டி இல்லை என்று புரிந்தது.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!