வரலாற்று வாசனைமிக்க வராக நதி, வாய் மூடி மௌனமாய் ஒரு தவசியைப்போல் ஓடிக்கொண்டிருக்கிறது.

தொலைவில் நடக்கும் யுத்த களத்து ரத்த வெள்ளம் இன்னும் அதன் அங்கத்தில் சங்கமித்துப் பங்கப்படுத்தவில்லை.

'கீழ்த்திசையின் திராய் நகரம்' என்று மேல்திசையால் மேனி சிலிர்க்கப் பாரட்டப்பட்ட செஞ்சி நகரம் மிஞ்சி நிற்குமோ, பஞ்சாய்ப் பறக்குமோ இது போன்ற பதட்ட நிலை...

வராக நதிக்கரையில் படை வீடுகளை அமர்த்தி ஒரு வார காலம் யுத்தம் நிகழ்த்தியும். செஞ்சிக்கோட்டையை விட்டு வெளிவர மறுக்கிறானே பாளைய அரசன் யசோதரன்!

'மாவீரன் என்று கேள்விப்பட்டோம்; இப்படி மார் தட்டிப் புறப்படாமல், சீர்கெட்டு முற்றுகையை நீடிக்கச் செய்வானேன்?' மாவீர சத்ரபதி சிவாஜி. 'யார் வீரம் வெல்லும்?' என்று பொருமினார்; ஒவ்வொரு நாளும் போர்க்களத்தில் யசோதரனை எதிர்பார்த்தார்.

செஞ்சியரணின் பிரதிநிதியாய் இருந்து ஆண்ட அரசன் யசோதரன். பீஜப்பூரின் செஞ்சோற்றுச் செல்வன் என்பது நாடு பிரசித்தம். பீஜப்பூர் சுல்தானுக்குக் கிடைத்த கலியுகக் கர்ணன். இது சிவாஜியும் அறிந்த செய்திதான். எத்தனை சமாதானத் தூது அனுப்பியும் மசியவில்லையே!

வந்த பதில்?

"நான் இந்துதான்! ஆயினும், இஸ்லாத்துக்குத் துரோகம் செய்யமாட்டேன். இது எனக்குள் நான் கற்பித்துக் கொண்ட நியாயம்! உங்களுக்கு வேண்டுமானால் அநியாயமாக இருக்கலாம்."

சினக்க வேண்டிய சிவாஜி, சிந்திக்கத் தொடங்கினார். 'நமது படையில் எத்தனை விசுவாசமிக்க இஸ்லாமியர்கள் இருக்கிறார்கள்! இதுபோல யசோதரன் இருப்பதில் என்ன தவறு? ஆயினும் எவ்வளவு நாட்களுக்குத்தான் இந்த வராக நதிக்கரை முற்றுகை நீடிப்பது?' ஆற்காட்டையும் வேலூரையும் அதாகதப்படுத்திய சிவாஜியால், செஞ்சியைப் பஞ்சாக்க முடியவில்லையே!

கூடாரத்தில் தீப்பந்தங்கள் எரிந்து கொண்டிருந்தன.

எதிரே சேனாதிபதி ரகுநாத பிரபு வேங்கைபோல் உலவிக் கொண்டிருக்கிறார்.

"பிரபோ! மலையரணுள் நுழைய வேண்டுமானால் செஞ்சி நகரை அழிக்க வேண்டும். இது தவிர வேறு வழி தென்படவில்லை."

"இப்பேர்ப்பட்ட அழகிய நகரையா?"

"இதைவிட நான் இப்படிச் சொல்லலாமா?"

சிவாஜி, 'சொல்லலாமே' என்பதுபோல் சிங்கக் கண்களைச் சிவக்காமல் நோக்குகிறார்.

"ஒரு சமயம் உங்கள் மாவீரத்தைக் கேலி செய்த யசோதரன் தேவியான சாவித்திரியைப் பழிவாங்க இந்த யுத்தமே ஒழிய, அழகிய இந்த நகரை அலங்கோலப்படுத்தவல்ல என்று ஏன் சொல்லக்கூடாது?"

சினந்து சிலிர்த்த ஆவேசத்தால், வலது முஷ்டியால் தொடையில் ஓங்கிக் குத்துவிட்டுக் கொண்ட சத்ரபதி சிவாஜி, "ஒருவிதத்தில் இதுவும் உண்மைதான் ரகுநாத்!" என்று கர்ஜித்த கர்ஜனை கேட்டு, வராக நதிக்கரையில் விரிக்கப்பட்டிருந்த அத்தனை கூடாரங்களும் அதிர்ச்சி கண்டு விழித்துக் கொண்டன.

காலைக் கதிரவன், ககன மார்க்கத்தைப் பொற் குளியல் செய்வித்துப் புறப்பட்டுக் கொண்டிருக்கிறான்.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!