நடராஜன் வீட்டுக்குள் நுழைந்ததும் எரிமலையாக நின்றான்!

கூடவே அக்கா சுமதி உள்ளே வந்தாள்!

"நாலு காசு சம்பாதிச்சா, வாய் கிழியுது பாரு!"

அம்மா உள்ளே வந்தாள்!

"சுமதி! நாம அவசரப்பட்டு அங்கே பேச வேண்டாம்னு சொன்னேன்! நீ கேக்கலை! ஒரு பொண்ணைப் பாக்கப் போய், அவ தங்கச்சியைக் கேக்கறது தப்பு தான்!"

அப்பாவும் சேர்ந்து கொண்டார்.

"அந்த விஜிக்கு வேலை இல்லைனு தெரிஞ்சுதான் நாம பாக்கப் போனோம்! அந்த புஷ்பா அதைக் கேட்டப்ப, பதிலே சொல்ல முடியல பாரு!"

"அந்த வாயாடிக்கு ஆதரவா?"

"இல்லை சுமதி! நாம, போய் பதில் சொல்றோம்னு வந்திருந்தா, கௌரவமா இருந்திருக்கும்! பிறகு நம்ம அபிப்ராயத்தை தரகர் மூலமாக்கூட சொல்லியிருக்கலாம்! நேருக்கு நேரா பேசிட்டு, இப்ப அவமானப்பட்டு வந்து நிக்கறோம் பாரு!"

"விடுங்கப்பா! அந்த புஷ்பா எங்கியாவது மாட்டுவா!"

"பேசிட்டு வந்தாச்சு! அவங்க என்ன பகையா? விடு சுமதி!"

"நான் வீட்டுக்கு புறப்படறேன்! ஒரு நாள் வீணாப் போச்சு!"

சுமதி புறப்பட்டு விட்டாள்!

நட்ராஜ் வந்து படுத்து விட்டான்! அம்மா அருகில் வந்தாள்!

"நட்ராஜ்! என் மனசுல உள்ளதைச் சொல்லட்டுமா?"

"என்னம்மா?"

"படிக்கலைனாலும், அந்த விஜிகிட்ட ஒரு பண்பாடு இருக்கு! அவளை பாதிக்கற மாதிரி சுமதி பேசியும், அந்தப் பொண்ணு எதுவுமே பேசலை! வாக்குவாதம் நடக்கும் போது, அந்த முகத்துல ஒரு வருத்தம் தெரிஞ்சது! அந்த விஜி முகத்துல ஒரு லட்சணம் இருக்கு! அழகு வேற! லட்சணம் வேற! தரகர் சொன்னாரே! மாடு மாதிரி அந்தக் குடும்பத்துக்காக உழைக்கறாளாம்! பாவம்!"

"நீ என்னம்மா சொல்ற?"

"வேலைக்குப் போற அழகான பெண்கள் புருஷனுக்கு பெரும்பாலும் அடங்கறதில்லை! குடும்பத்துல குழப்பம்தான் வருது! அமைதியான குடும்பம் வேணும்னா, விஜி மாதிரி பெண்கள்தான் வரணும்! நட்ராஜ்! கோவப்படாதே! உனக்கும் வயசு கூடியாச்சு! தலை முழுசா வழுக்கை! உன் வாலிபம் குறையத் தொடங்கியாச்சு! உனக்கு மட்டும் கல்யாணத்துக்கு முழுமையான தகுதி இருக்கா? அழகான, குறைஞ்ச வயசுப் பொண்ணு உன்னை ஏத்துப்பாளா? சொல்லு!"

நடராஜ் பேசவில்லை!

"நீ என் பிள்ளைடா! உன்னை நான் கேவலப் படுத்தலை! புண் படுத்தணும்னு சொல்லவும் இல்லை! ஆனா யதார்த்தம்னு ஒண்ணு வேணுமில்லையா? காலம் கடந்து கல்யாணம் நடக்க நேர்ந்தா, அழகும், இளமையும், பணமும் சரிவராது! குடும்பப் பாசமுள்ள நல்ல துணை வேணும்! அதுதான் முக்கியம்!"

நடராஜ் திரும்பிப் பார்த்தான்!

Sign up now to get the most out of Books2Read

Discover something great at Books2Read.

Thanks for signing up for Books2Read notifications!