"கன்கிராட்ஸ் புவனா. ரொம்ப நல்ல உத்தியோகம் இது. ஆனா ஒரு பிரச்சனைடீ."

"என்ன?"

"நிரந்தரமில்லையே."

"ஏன்?"

"காலம் முழுக்க நீ தனியா வாழ முடியுமா? போகட்டும். கொச்சி போய் அப்பாவைக் கூட்டிட்டு வரப் போறியா?"

"இல்லை."

"என்னடீ சொல்ற?"

"அவர் இல்லைனு சொல்றேன்."

"புரியலை."

"அவர் இறந்து ரெண்டு வருஷம் முடிஞ்சாச்சு ருக்கு."

"அப்படியா? இதை ஏன் நீ முன்னாலேயே சொல்லலை? நீ இப்ப அங்க தனியாவா இருக்கே?"

"ம்."

"உன் ஜீவனம்?"

"ஏதோ நட்டா முட்டி வேலை செஞ்சு வயத்தைக் கழுவறேன் ருக்கு. முறையா எந்த வேலையும் கிடைக்கல எனக்கு. அதுக்காகத்தான் மெட்ராஸ் வந்தேன். கிடைச்ச வாய்ப்பை நான் விட முடியாது ருக்கு."

"ஸாரி, இதை நான் எதிர்பார்க்கலை. சரி நீ போயிட்டு வந்துரு."

புறப்பட்டு விட்டாள் புவனா.

அவள் விலகியதும் -

"ருக்கு ஒரு நிமிஷம்."

"என்னப்பா?" கணவனை ஏறிட்டாள்.

"சொல்றேன்னு தப்பா நினைச்சுக்காதே. உன் தோழி வாழ்க்கைல ஏதோ ஒரு மர்மம் இருக்கு. அவ பிடி கொடுத்துப் பேசறதில்லை பார்த்தியா?"

"அதுதான் எனக்கும் புரியலை."

"சரி விடு. நம்மை நாடி வந்தா உதவணும். அது நம்ம கடமை."

மூன்றாம் நாள் புவனா சென்னை திரும்பி விட்டாள். உடைமைகள் என்று சொல்லிக் கொள்ள அதிகம் எதுவும் அவளிடம் இருக்கவில்லை. வந்ததும் டெலிபோன் செய்யும்படி சொல்லியிருந்தான் அரவிந்த்.

விலாசம் கேட்டுக் கொண்டு அடுத்த அரை மணி நேரத்தில் கம்பெனி வேன் வந்து ருக்மணியின் வீட்டு வசலில் நின்றது.

புவனா புறப்பட்டு விட்டாள்.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!