அது ஒரு மூன்று நட்சத்திர ஓட்டல்! அலங்காரமான சுழலும் உணவகம் உச்சத்தில் நகரத்தை வேடிக்கைப் பார்த்துக்கொண்டே கீர்த்தி உட்கார்ந்திருக்க, ரங்கா ஒன்று விடாமல் சகலமும் சொல்லி முடித்தான்!

"ஓ... எல்லாம் தெரிஞ்சாச்சு!"

"ஆமாம்! ஒரு வகைல நல்லதுதான் கீர்த்தி. அக்கா படிச்சவ! இதைச் சுலபமா ஒத்துக்கிட்டா! அம்மாவால முடியலை!"

"உங்கம்மா என்னை நம்பலியா?"

"அப்படி இல்லை, நான்தான் சொல்லியிருக்கேனே ஒனக்கு. பொறுப்பில்லாத எங்கப்பா குடிகாரர். குடுபம் தவிச்சப்ப தாங்கிப் புடிச்சது எங்கம்மா! இப்ப என்னை ஆளாக்கினது அக்கா! அவங்க வயசு கடந்து போயிட்ட காரணமா, அவங்க நின்னு போயிடக்கூடாதேன்னு அம்மாவுக்கு பயம். நியாயம்தானே?"

"உங்கக்கா கல்யாணத்துக்கு தீவிர முயற்சி செய்யறீங்களா?"

"நிச்சயமா. கைகூடலை!"

"நான் அப்பாகிட்ட பேசும் போது, இதையும் பேசறேன்! அவரும் முயற்சி செய்யட்டும்."

"கீர்த்தி!"

"இதப்பாருங்க! எங்கப்பா பற்றி உங்களுக்கும் தெரியும். அவர் மத்தவங்களுக்கு உதவி செஞ்சுதான் பழக்கம்! புரியுதா?"

"தேங்க் யூ! நான் எப்ப உன்னை எங்க வீட்டுக்குக் கூட்டிட்டுப் போகலாம்?"

"எதுக்கு?"

"எங்கம்மா, அக்காவை நீ பார்த்துப் பேச வேண்டாமா?"

"நான் இப்பவே ரெடி!"

"நாளைக்கு நாள் நல்லா இருக்கு! நல்ல நாள்ல எங்க வீட்ல நீ காலை எடுத்து வை!"

"சரி! எங்கப்பாவும் நாளைக்குத்தான் வர்றார். நான் உடனே பேசிக்கறேன்!"

ரங்காவுக்கு நம்பிக்கை இருந்தது.

அன்று இரவு அக்காவிடம் விபரம் சொன்னான்.

"நாளைக்கு கீர்த்தியைக் கூட்டிட்டு வர்றேன்!"

"சரிடா! அவளும் அவங்க வீட்ல பேசட்டும்! எல்லாம் நல்லதுக்கே."

அம்மா எதுவும் பேசவில்லை.

மறுநாள் காலை... ரங்கா புறப்பட்டுப் போன பிறகு தரகர் வந்தார்.

"என்ன தரகரே இந்தப் பக்கம்?"

"ஒரு நல்ல வரன் வந்திருக்கு அம்மா!"

"யாருக்கு?"

"ஒரு அண்ணன் தங்கச்சி! பெத்தவங்க இல்லை. தங்கச்சியை ஆளாக்கினதே இவர்தான். பத்து வருஷ இடைவெளி! தங்கச்சிக்காக இவரும் கல்யாணம் செஞ்சுக்கலை."

"சரி!"

"குடுத்து, எடுக்க நல்ல இடம். அவர் சொந்தமா பிஸினஸ் பண்றார். பெரிய ஜவுளிக்கடை, பாத்திரக் கடைனு டவுன்ல இருக்கு. பொன்னுரங்கம் டெக்ஸ்டைல்ஸ், பொன்னுரங்கம் ஸ்டீல்ஸ்னு இருக்கும்! அவர்தான் பாத்துக்கறார். பெரிய வருமானம். தங்கச்சி எம்.காம். படிச்சிருக்கு. வேலைக்குப் போகலை. அவருக்கு முப்பத்தி மூணு! தங்கச்சிக்கு இருபத்தி மூணு! குடுத்து, எடுத்துடலாமா! பேசவா?"

உமா குறுக்கிட்டாள்!

"எனக்கு மட்டும் பாக்க முடியாதா?"

"இல்லீங்க! தங்கச்சியை வாழ வைக்க, தான் காலம் முழுக்க பிரம்மச்சாரியா வாழ இவர் தயார். இந்த மாதிரி ஒரு அக்கா தம்பி இருக்கறதா தெரிஞ்சா, அவரைச் சம்மதிக்க வைக்கலாம். வசதியான குடும்பம். குடுத்து எடுக்கற காரணமா ஜாதகம் பாக்க வேண்டாம்! என்ன சொல்றீங்க.?"

அம்மா முந்திக் கொண்டாள்.

"பாக்கலாம்!"

"அம்மா! என்ன உளறுற?"

"நீ இருடி! தரகரே! இதுல மேற்க்கொண்டு எப்பப் பேசணும்னு சொல்லுங்க?"

"அவங்களை கலந்து பேசிட்டு நாளைக்கு நான் வர்றேன்மா."

தரகர் புறப்பட்டுவிட்டார்.

உமா சீறினாள்.

"உனக்குப் பைத்தியமா? காதலிக்கற பெண்ணை உதறிட்டு, துணிக்கடைக்காரரோட தங்கச்சியை ரங்கா கட்டிப்பானா?"

"இருடி! இது அமைஞ்சா, உனக்கும் பாதுகாப்பு."

"ஆனா, என் தம்பிக்கு ஆபத்து. ஒரு கோடீஸ்வரன் மகளை காதலிச்சு கை விட்டா, அவன் முதலாளி சும்மா இருப்பாரா? பெத்த பிள்ளையோட தலைல நெருப்பை வைக்க நீயே ஆயத்தமா இருக்கியா?"

"உமா!'

"போதும்மா! உன்கிட்ட பேசவே எனக்குப்பிடிக்கலை! எப்ப உனக்கு இப்படி குணம் கெட்டுப் போச்சு? எனக்குக் கல்யாணமே வேண்டாம். என் காரணமா, என் தம்பி மனதை உடைய ஒருனாலும் நான் சம்மதிக்க மாட்டேன்!"

சீறி விட்டு உமா உள்ளே போக,

பாக்யம் நொந்து போனாள். ஒரு ஓரமாக வந்து உட்கார்ந்தாள்.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!