ரஞ்சனா குளித்து முடித்து அந்த ஆனந்தா நீல நிறம் கொண்ட சுடிதாரை அணிந்து தலைமுடியை சீர் செய்தாள். அதற்குள் வண்டியை கழுவி துடைத்து விட்டிருந்தாள் நித்யா.

"நானே குளிச்சு முடிச்சு கழுவலாம்னு இருந்தேன் நித்தி."

"யார் செஞ்சா என்ன ரஞ்சி?" வா காபி சாப்பிடலாம்." என்று உள்ளே சென்றனர்.

சூடான குழிப்பணியாரமும் பில்டர் காபியும் தந்து உபசரித்தாள் கோகிலா.

அவர்கள் இருவரும் கேலியாகப் பேசியபடி சிரிப்பதை ஒரு புன்னகையுடன் பார்த்தவள்,

"ம்ஹூம்! ரஞ்சி, நித்தி! இப்படி ஜாலியா இணை பிரியாம நீங்க எல்லாரும் இருக்கீங்க, கல்யாணம் ஆனாலும் உங்க நட்பு வட்டம் தொடரணும். ஆனா உங்களைக் கல்யாணம் பண்ணிக்கப் போறவன் எப்படி இருப்பானோ தெரியலையே" என்று பெருமூச்சுடன் சொன்னாள்.

ஊசி விழுந்தால் கூட கேட்கும் அளவு அங்கே சட்டென்று அமைதி நிலவியது.

மௌனம் அங்கு மௌனமாக ஆட்சி புரிய, நித்யா தான் படபடப்புடன் சொன்னாள்.

"ஷ்! என்னம்மா நீங்க! ரஞ்சிக்கு கல்யாணப் பேச்சை எடுத்தாலே பிடிக்காதுன்னு தெரியும் இல்லை" என்று சொன்னவள் பட்டென்று அமைதியாகி ரஞ்சனாவைப் பார்த்தாள். கண்களில் கனவுடன் இதழோரம் குறுநகையுடன் ஏதோ கனவுலகில் சஞ்சரிப்பதைப் போல அமர்ந்து இருந்த தோழியை வியப்புடன் பார்த்தாள் நித்யா.

"ஏய்! இங்க பாருங்கப்பா! கல்யாணம் அது இதுன்னு இந்த மாதிரி அர்த்தமில்லாத விஷயத்தைப் பத்தி பேசறதா இருந்தா நான் கிளம்பறேன். நிறைய உருப்படியான விஷயம் அதுவும் அறிவுப்பூர்வமான விஷயம் பேசலாமே! அதை விட்டு ச்சே!" என்று சலித்துக் கொண்டு சொன்ன ரஞ்சனாவா இது?"

அதன் பிறகு எதுவும் பேசாமல் வண்டியில் செல்லும் போது நித்யா திடீரென்று பாடினாள்.

"பார்த்த முதல் நாளே - உன்னை

பார்த்த முதல் நாளே..."

"என்ன ஆச்சு நித்தி? இன்னிக்கு ரொம்ப ஜாலியான மூட்ல இருக்கே போல" என்று ரஞ்சனா கேட்கவும்,

"உதை விழும்! முழு பூசணிக்காயை சோத்துல மறைக்கற மாதிரி சமாளிக்காதே! அம்மணி முகத்தில ஒரு ஒளி தெரிஞ்சுதே! சொல்லுடி! யார் உன் மனம் கவர்ந்த மணாளன்."

"ஹய்யோ! நித்தி! அதெல்லாம் ஒண்ணும் இல்லைப்பா" என்று சொல்லும் போதே முகம் சிவந்து போனது.

"ஏய்... ஏய்... பொம்பளை கமலஹாசன்... ச்சே! கமலஹாசனி உலக மகா நடிப்பு நடிக்காதே! கமான் டெல் மீ! யார் அவன்?"

"ஏய்! மரியாதையா பேசு நித்தி."

"சரி ஆத்தா! யாருப்பா அது?" என்று ஆர்வத்துடன் கேட்கவும், காலையில் நடந்த சம்பவத்தை ஒன்று விடாமல் தோழியிடம் பகிர்ந்து கொண்டாள் ரஞ்சனா.

"ப்ச்! நித்தி! அவர் ஏற்கனவே கமிட்டட் நித்தி. அவ பேரு விசித்ரா! ஆள் ரொம்ப அழகு, நல்லா நறுவிசா ட்ரெஸ் பண்ணியிருந்தா தெரியுமா?"

"இருந்தா என்ன! மேக்கப் அதிகமா போட்டு இருப்பா! கடவுளோட பிராப்தம் எப்படியோ அப்படி தானே நடக்கும். நம்ம கையில என்ன இருக்கு? யாரு கண்டா! நீயே அவனை அதான் அந்த செல்வாவை விரும்ப ஆரம்பிச்சிட்டே! நாளடைவில் நீயே அவரைக் கல்யாணம் பண்ணிக்கற மாதிரி வாய்ப்பு வந்தாலும் வரலாம் இல்லையா?"

"ப்ச்! நடக்கற விஷயமா பேசு நித்தி" என்று அப்பொழுது அந்தப் பேச்சுக்கு முற்றுப்புள்ளி வைத்தாலும் அவனின் காதல் மனம் அந்தப் பேச்சை மிகவும் ரசிக்கத் தான் செய்தது.

நித்யாவின் வாய் முகூர்த்தமோ அல்லது இயற்கையின் நிகழ்வோ அல்லது கடவுளின் கருணையோ, அன்று மதியமே தமிழ்ச்செல்வனை மீண்டும் சந்திக்க நேர்ந்தது ரஞ்சனாவிற்கு.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!