எல்லாம் முடிந்துவிட்டது. சந்திரனுடைய பதினாறு நாள் காரியங்கள் நேற்றோடு முடிந்து விட்டன.

குழந்தையுடன் திக்குத் தெரியாமல் நின்றாள் கிரிஜா!

கிரிஜாவுக்கு 29 வயது. ஒன்பது வயதில் ஒரு பெண் குழந்தை உமா!

பல பெண்களுக்கு வாழ்க்கை ஆரம்பிக்கும் வயதே இதுதான். கிரிஜாவுக்கு முடிந்தே விட்டது!

மஞ்சள் காமாலை சந்திரனுக்கு எமனாக முடிந்துவிட்டது. அது முற்றிய கட்டத்தில்தான் நிஜம் தெரிந்தது. ஆஸ்பத்திரியில் சேர்க்காமல் ஏதோ ஒரு நாட்டுவைத்தியம் பலனளிக்கும் என்ற மூடநம்பிக்கையில் பச்சிலை மருந்தை மூன்றுவேளை சாப்பிட்டதன் விளைவு அதிலிருந்த கடுமையான விஷம் ரத்தத்தில் கலக்க, அதை சாப்பிட்ட மூன்றாம் நாளே சந்திரனின் கதை முடிந்து விட்டது.

போன மாதம் வரை உற்சாகமாகப் பூத்துக் குலுங்கிக் கொண்டிருந்த கிரிஜா, நொடியில் வாடி வதங்கிப் போனாள்.

அந்தக் கடுமையான அதிர்ச்சியிலிருந்து அவளால் மீளவே முடியவில்லை!

அவளது அண்ணன் பிரபு எல்லாம் முடியும் வரை மனைவியுடன் இருந்தான்.

கிரிஜாவுக்கு அப்பா, அம்மா இல்லை! கல்யாண சமயத்தில் இருந்தார்கள், நாலு வருடங்களுக்கு முன்பு ஒருவர் பின் ஒருவராக போய்ச் சேர்ந்து விட்டார்கள்.

அண்ணன், அண்ணிதான் பிறந்த வீட்டுபந்தம்!

ஆனால் சந்திரனுக்கு அப்பா, அம்மா, தம்பி, கல்யாணம் ஆகாத ஒரு தங்கை எல்லாரும் உண்டு,

"கிரிஜாவை அழைச்சுக்கிட்டுப் போய் எங்ககூட பத்து நாள் வச்சிட்டு அனுப்பட்டுமா?

பிரபு பவ்யமாக மாமியாரிடம் கேட்டாள்.

"சரிப்பா நீ கூடப்பிறந்தவன், தாராளமா கூட்டிட்டுப் போ" கிரிஜாவும் அனுமதி கேட்டாள்.

"சரிம்மா! குழந்தையை பத்திரமா பாத்துக்கோ"

கிரிஜா அண்ணன், அண்ணியுடன் புறப்பட்டு பிறந்த வீட்டுக்கு வந்துவிட்டாள்.

கோடை காலமாக இருந்ததால் குழந்தைக்கு பள்ளிக்கூட விடுமுறை! அப்பா செல்லம் வேறு! அது ஆசைப்பட்டால், உடனே எப்பாடுபட்டாவது நிறைவேற்றிவிடுவான் சந்திரன்.

அப்படிப்பட்ட அப்பாவை நிரந்தரமாக இழந்ததில் அது நொறுங்கிப் போயிருந்தது. அதன் சோகத்தைப் பார்த்துத்தான் கிரிஜா இன்னும் பாதிப்புக்கு உள்ளாகியிருந்தாள். பிறந்த வீட்டுக்கு வந்து விட்டார்கள். முதல் இரண்டு நாட்கள் பிரபு எதுவும் பேசவில்லை!

தங்கையை அமைதியாக விட்டு விட்டாள்.

எது பேசினாலும் அவளைப் பாதிக்கலாம் என்ற பயத்தில் மௌனமாக இருந்துவிட்டான். அண்ணி அவளுடன் இயல்பாகப் பழகி, கிரிஜாவை கூட்டுக்குள்ளிருந்து கொஞ்சம் வெளியே கொண்டுவர முயற்சித்தாள், கிரிஜாவுக்கு வேலையில்லை! சந்திரன் பட்டதாரி. ஆனால் உத்யோகம் பார்க்கவில்லை! தொழிற்பேட்டையில் ஒரு சிறிய இன்ஜினியரிங் ஃபேக்டரி. அப்பா பேரில்தான். ஆனால் உழைப்பு மொத்தமும் சந்திரனுடையது தான், அப்பா வடிவமைத்துக் கொடுத்து விட்டார். சந்திரன் கடுமையாக உழைத்து அந்த இண்டஸ்ட்ரியை லாபகரமாக நடத்திக்கொண்டிருந்தான். அதன் மூலம் வீட்டின் வசதிகளை நன்றாகப் பெருக்கி விட்டான். பேங்க பேலன்ஸ் கணிசமாக உயர்ந்தது. ஆனால் அப்பா பேரில்தான் சொத்து, பெரியவர்களும் அன்பாக இருந்தார்கள்,

அதனால் கிரிஜாவிடம் எந்த வேற்றுமையும் தெரியவில்லை! வீட்டு நிர்வாகம் முழுக்க அவளிடம்தான் இருந்தது!

இத்தனை சீராகப் போய்க் கொண்டிருந்த குடும்பத்தில் இடி இறங்கியது தான் கொடூரம்.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!