காலையில் சாந்தினி ஆபீஸ் போக பேருந்துக்காக காத்திருந்தாள்!

சரக்கென பைக் அருகில் வந்து நின்றது!

நிமிர்ந்தால், பரத் நின்றான்!

"தெரியுதா?"

"மறக்க முடியுமா? நேத்துதானே உங்கண்ணன் கூட பெண் பார்க்க வந்தீங்க?"

"மரியாதை எதுக்கு? நான் கடைசி வருஷ மாணவன்! உங்களை விடச் சின்னவன்! வா போன்னு கூப்பிடலாம்!"

"அதெப்படி?"

"சரி! உங்ககூட நான் கொஞ்சம் தனியாப் பேசணும்! எப்ப வசதிப்படும்?"

"ஆபிசுக்கு வர்றீங்களா?"

"இன்னிக்கே வர்றேன்! நான் கடைசி வருஷம் இன்ஜினீயரிங் படிக்கிறேன்! அடுத்த மாசம் எட்டாவது செமஸ்டர் பரீட்சை! காலேஜ் காம்பஸ் இண்ட்டர்வியுல எனக்கொரு கம்பெனில வேலை கிடைச்சாச்சு!"

"வெரிகுட்! ஆபீசுக்கு வாங்க! பேசலாம்!"

விலாசம், போன் நம்பர் தந்தாள்!

சரியாக பத்துமணிக்கு பரத் வந்து விட்டான்! சாந்தினிக்கு தனி கேபின்! எந்த இடையூறும் இல்லை! காபிக்கு சொன்னாள்!

"சொல்லு பரத்!"

"குட்! இது புடிச்சிருக்கு எனக்கு!"

"என்ன விஷயம்?"

"உங்கக்காவுக்கு புடிச்சிருக்கா? மனப்பூர்வமா சம்மதமா?"

"என்ன சந்தேகம்?"

"அதில்லை! அம்மாவோட பேச்சு, அதுல தெரிஞ்ச அதிகார தோரணை - டிமாண்ட் இதெல்லாம் பாதிச்சிருக்கா? அக்காவை மட்டுமில்லை... உங்க எல்லாரையும்?"

"பரத்! எங்க வீட்டுப் பொண்ணுக்கு நாங்க செஞ்சுதானே ஆகணும்! கட்டின சேலையோட ஏத்துக்கற மனப்பக்குவம் யாருக்கு இருக்கு! அப்படியே செஞ்சாலும், நாளைக்கு மனசு மாறி குத்திக் காட்டினா?"

"அப்படி சொல்றீங்களா?"

"பரத்! அக்காவுக்கு படிப்பு பெரிசா இல்லை! உத்யோகம் இல்லை! கல்யாண மார்க்கெட்ல ஒரு பொண்ணுக்கு இது ரெண்டும் முக்கியமில்லையா! அது இல்லாத ஒருத்திக்கு பிரமாதமான மாப்ளை அமையும் போது அதுக்கான விலையை நாங்க குடுத்துதானே ஆகணும்? இல்லையா?"

"அழகா பேசறீங்க சாந்தினி!"

"மூணு வயசு வித்யாசத்துக்கு நீயும் என்னை வா - போன்னே கூப்பிடலாம்!"

"சரி சாந்தினி! கல்யாண பட்ஜெட் என்ன? நான் தெரிஞ்சுக்கலாமா?"

"தாராளமா! மொத்தம் பதினேழு லட்சம்! கையில் அஞ்சு இருக்கு! 12 ரூபா கடன் வாங்கணும்!"

"முடியுமா?"

"நானும் அப்பாவும் சம்பாதிக்கிறோமில்லையா! வட்டி கட்டற திராணி இப்ப இருக்கு பரத்!"

"உனக்குக் கல்யாணம் நடக்க வேண்டாமா?"

"ரெண்டு வருஷம் போகட்டும்! சுதாரிச்சிட்டு அப்புறமா யோசிக்கலாம்!"

"உங்கக்கா சந்தோஷமா இருப்பாங்கனு நம்பிக்கை உங்களுக்கு இருக்கா சாந்தினி?"

"பரத்! வேலைக்கு போற காரணமா உங்கம்மா கொடுமைக்காரினு நாங்க யாரும் நினைக்கலை! எங்கக்கா எங்க வீட்ல வேலை செய்யலையா? எனக்கும், அப்பாவுக்கும் எல்லாத்தையும் கைல கொண்டு வந்து தரலியா? அதை உங்க வீட்டு மனுஷங்களுக்கு செய்யட்டுமே! தப்பென்ன?"

பரத் கண்களை அகல விரித்தான்!

"உங்கக்கா மன நிலை எப்படி இருக்கு?"

"அவ என்னை விட எல்லாத்தையும் பாஸிட்டிவா எடுத்துப்பா! யாரையும் கோவப்பட அவளுக்குத் தெரியாது பரத்! உழைக்கத் தயங்க மாட்டா! ரொம்பவே அனுசரிச்சுப் போவா!"

"குடும்ப நிர்வாகம்னு சொன்னா, நிதி நிர்வாகம் எப்பவும் எங்கம்மா கைலதான்!"

"இருக்கட்டும்! ஒருத்தர் உள்ளே நுழையறதுக்குள்ளே ஆட்சி கை மாறணும்னு எதிர்பார்க்க முடியுமா? எதுவுமே படிப்படியா மாறினாத்தானே பக்குவமா இருக்கும்?"

"இப்பவும் அழகா பேசறே நீ!"

"எனக்கு ஆச்சர்யம் பரத்!"

"என்ன?"

"நீ ஒரு மாணவன்! இப்பத்தான் படிப்பை முடிக்கப் போறே! உன் வயசுல உள்ள பசங்க ஜாலியா தன்னைப் பற்றி மட்டும் தான் நினைப்பாங்க! நீ எப்படி குடும்பத்துக்குள்ளே இத்தனை ஆழமா ஊடுருவி உள்ளே நுழைஞ்சே?"

"அது என் சுபாவம் சாந்தினி! நண்பர்கள் கூட ஜாலியாவும் இருப்பேன்! ஆனா பிரச்சனைகளை கூர்ந்து கவனிக்கறது என் பழக்கம்! நியாயம் தவறி நடந்தா, அது யாரா இருந்தாலும் தட்டிக் கேக்காம நான் விடமாட்டேன்! அதனால எனக்கும் அம்மாவுக்கும் மோதல் அதிகமா வரும்!"

Sign up now to get the most out of Books2Read

Discover something great at Books2Read.

Thanks for signing up for Books2Read notifications!