மாலா ஜன்னல் வைத்த ஜாக்கெட் அணிந்து இருந்தாள்.

கட்டிய வீட்டுக்குக் கட்டாயம் ஜன்னல் தேவை, காற்றோட்டத்துக்காக. கன்னியரின் ஓடை முதுகுக்கு ஜன்னல் எதற்கு? காற்றோட்டத்துக்கா? காமன் கணை தொடுக்கவா?

மாலாவுக்குக் காரணம் தெரியாது. ஆனால் அதுதான் நாகரிகம் என்று நினைத்தாள். ஜாக்கெட்டின் நடுப்பாகத்தில் ஆல் இலை வடிவில் வெட்டி எடுத்திருந்தாள்! மன்மதனின் சின்னம் அவள் முதுகிலே பதிக்கப்பட்டது போல இருந்தது. அதன் வழியாகத் துப்பாக்கி அவளின் நடுமுதுகைத் தொட்டுக் கொண்டு இருந்தது. எனவே பயத்தோடு ஒருவிதக் கூச்சமும் கலந்தது. முதுகிலே எறும்பு ஊர்வது போல இருந்தது!

துப்பாக்கியின் ஒரு முனை அவள் முதுகைத் தொட்டுக் கொண்டு இருக்க, மறுமுனை ஓர் இளைஞனின் கையில் இருந்தது.

கொடுவாள் போன்ற மீசை! கோழி முட்டைக் கண்கள்! கோடரி பற்கள்! குடமிளகாய் மூக்கு! குருவிக்கூடு போன்ற தலைமுடி! எல்லாமாகச் சேர்த்து இந்த இளைஞனுக்கு ஒரு பயங்கரத் தோற்றத்தை அளித்தன.

அவனைப் பார்த்ததும், அவள் கைகள் நடுங்கின. அந்த நடுக்கத்துக்குத் தகுந்தபடி காரும் நடனம் ஆடியது - நல்ல பாம்பு ஒன்று நெளிந்து நெளிந்து ஓடியது போல இருந்தது.

காரைக் கொண்டு போய் எதிலும் மோதி விடுவாள் போலிருந்தது. அதற்குள் அந்த மீசைக்காரன், "காரை ஓரமாக நிறுத்து!" என்று கட்டளையிட்டான்.

மாலா உடனே காரை ஓர் ஓரமாகக் கொண்டு சென்று நிறுத்தினாள்.

இந்தக் கோழி முட்டைக் கண்ணன் எப்படிக் காருக்குள் வந்தான் என்று மாலா யோசித்தாள். சினிமா அதிபர் சிங்காரத்தின் வீட்டில் அவள் காரை நிறுத்தியிருந்த பொழுது இவன் எப்படியோ அதில் ஏறிப் பின் இருக்கையில் இவ்வளவு நேரமும் பதுங்கியிருந்தானோ?

அவள் இப்படிச் சிந்தித்துக் கொண்டு இருந்த பொழுதே, அவன், "உம்... கழுத்தில் கிடப்பதைக் கழற்று!" என்று உறுமினான்.

அவள் கழுத்திலே ஒரே ஒரு முத்து மாலைதான் அணிந்திருந்தாள். ஆனால், அதுவே பத்துப் பதினைந்து ஆயிரம் தேறும்.

பதில் ஒன்றும் சொல்லாமல், முத்துமாலையைக் கழற்றி அவன் கையிலே கொடுத்தாள்.

அவன் கீழே இறங்கினான். "கூச்சல் போடாமல் போ!" என்று அவளை மிரட்டி விட்டு, அவன் நடந்தான்.

சற்று தூரத்தில் ஒரு மரத்தடியில் ஒரு ஸ்கூட்டர் நின்றது. அதில் ஏறிக்கொண்டு குறுக்கு வழியே பாய்ந்து சென்றான்.

அவனையே பார்த்துக் கொண்டு இருந்த மாலா, திட்டமிட்டே வந்திருக்கிறான் என்று நினைத்தாள்.

அப்பொழுது, "சர்... பட்... பட்... படார்..." என்ற பேரோசையுடன் ஒரு மோட்டார் சைக்கிள் வந்து அவள் காரை முத்தமிட்டுக் கொண்டு நின்றது.

அந்த ஓசையைக் கேட்டதும் முதலில் மாலா பயந்து விட்டாள். மோட்டார் சைக்கிளைப் பார்த்ததும் அவள் பயம் நீங்கியது. அந்த மோட்டார் சைக்கிளில் காக்கிச் சட்டைக்காரர் ஒருவர் அமர்ந்து இருப்பதைப் பார்த்ததும், அவளுக்குப் புதிய தைரியம் பிறந்தது.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!