மதியழகனின் அறை மிகப் பெரியது.

அது ஒரு கலைக்கூடத்தைப்போல விளங்கியது. அழகிய சிலைகள், எழில் மிக்க ஓவியங்கள், இன்று பூத்த மலர்கள் ஆகியவை அறையை அழகுபடுத்தின. 'குளு குளு' வசதியும் செய்யப்பட்டு இருந்தது. ஓர் அலமாரியில் வரிசையாக நூல்கள் அடுக்கப்பட்டு இருந்தன.

அறையின் நடுப்பகுதி மரப் பலகையால் மறைக்கப் பட்டு இருந்தது. அந்தப் பகுதியில் தான் பழைய தட்டெழுத்துக்காரி இருந்தாள். அடிக்கடி அழைக்க வேண்டியிருந்ததால் மானேஜரின் அறைக்குள்ளேயே ஒரு பகுதியில் தட்டெழுத்துக்காரிக்கு இடம் ஒதுக்கப்பட்டு இருந்தது. அந்த அறைக்கும் மானேஜரின் அறைக்கும் இடையில் தள்ளு கதவு இருந்தது.

தள்ளு கதவைத் திறந்த மதியழகன், "குமாரி தாரா, உள்ளே செல்லுங்கள். இது தான் உங்கள் இடம்" என்று சொன்னான்.

வெளியில் நின்றபடியே தாரா உள்ளே எட்டிப் பார்த்தாள்.

ஒரு மேஜை. அதன் மீது "டைப்ரைட்டர்."

அந்த மேஜைக்குப் பக்கத்தில் இன்னொரு மேஜை. அதன் மீது "பைல்"கள் குவிந்து கிடந்தன. டெலிபோனும் இருந்தது. ஒரு "பிளாஸ்கு"ம் காணப்பட்டது.

"நீங்கள் என்னை அடிக்கடி சந்திக்க வேண்டியிருக்கும், எனவே, என் அறைக்குள்ளேயே உங்களுக்கு ஒரு பகுதி ஒதுக்கப்பட்டு இருக்கிறது. மேலும் மற்ற சிப்பந்திகளுடன் நீங்கள் தொடர்பு கொள்ள வேண்டிய அவசியமும் இல்லை" என்று மதியழகன் சொன்னான்.

தாராவை உள்ளே அழைத்துச் சென்று, நாற்காலியில் உட்கார வைத்தான். "உங்களுக்கு என் நல்வாழ்த்துக்கள். நீங்கள் மேலும் மேலும் முன்னுக்கு வரவேண்டும்" என்று அவளுக்கு வாழ்த்துத் தெரிவித்துவிட்டு, தனது இருக்கைக்குத் திரும்பினான்.

அவன் போனதும், தாரா தனது அறையை ஒரு 'நோட்டம் விட்டாள். மேஜையில் இருந்த "பைல்"களை புரட்டிப் பார்த்தாள். வேலைக்குப் புதியவளான அவளுக்கு ஒரே மலைப்பாக இருந்தது. அப்படியே நாற்காலியில் சாய்ந்து உட்கார்ந்து விட்டாள்.

அவளது சிந்தனை மதியழகனை தழுவியது!

எவ்வளவு பெரிய அலுவலகம். எவ்வளவு சிறிய மானேஜர்!

அவனுக்கு இருபத்தைந்து வயதுக்கு மேலே இருக்காது வாட்டசாட்டமான வாலிபன். அழகிய அரும்பு மீசை. அப்பழுக்கற்ற முகம். கிருதா புருதா என்று எதையாவது வளர்த்து அந்த முகத்தைக் கெடுத்துக் கொள்ளவில்லை!

தாராவின் மனக்கண் முன் மதியழகனின் மன்மத உருவம் ஊஞ்சலாடியது!

அதைக் காணக் காண அவள் உள்ளத்தில் ஓர் இன்பம் ஊற்றெடுத்தது!

மதியழகன் ஓர் இரட்டை பட்டதாரி. மானேஜர் வேலைக்காகத் நேரடியாகத் தேர்ந்து எடுக்கப்பட்டு, பம்பாயில் ஓராண்டு பயிற்சிக்குப்பின், சென்னைக் கிளையின் மானேஜராக நியமிக்கப்பட்டான். பள்ளிக்கூட நாளிலேயே படிப்பிலும், விளையாட்டுகளிலும், சிறந்து விளங்கினான் தேக்கு மரம் போன்ற உறுதியான உடல் கட்டு. நல்ல அழகிய தோற்றம். சலியாத உழைப்பாளி. இன்னும் முன்னுக்கு வர அவனுக்கு எவ்வளவோ வாய்ப்புகள் இருக்கின்றன. இதெல்லாம் தெரிந்தால்; தாரா "ஆ" என்று மூக்கிலே விரலை வைத்துவிடுவாள்!

போன் சிந்தனை ஓட்டத்தை திசை திருப்புவதற்காக தாரா ஒரு பைலை கையில் எடுத்துப் புரட்டினாள். அது தலைமை அலுவலகத்துடன் நடத்தும் கடிதப் போக்குவரத்து பற்றிய "பைல்".

கடிதங்களில் மதியழகனின் கையெழுத்து முத்து முத்தாக அழகாக இருந்தது.

அதைப் பார்த்ததும் தாராவுக்கு மீண்டும் அவன் நினைவுகள் தோன்றின!

அவன் அந்தக் கையெழுத்தைவிட அழகாக இருந்தான்!

நாகரிகம் என்ற பெயரில் அந்த அழகை அவன் அலங்கோலப் படுத்திக் கொள்ளவில்லை. இது தாராவுக்கு மிகவும் பிடித்திருந்தது.

மீண்டும் அவனைப் பார்க்க வேண்டும் என்ற ஆசை அவளுக்கு துளிர்த்தது.

Sign up now to get the most out of Books2Read

Discover something great at Books2Read.

Thanks for signing up for Books2Read notifications!