Buku leyi yi vulavula ngopfu hi Masingita loyi a hanya ngopfu hi switsundzuxo swo huma eka munghana wa yena Homboloka hambi swi nga pfuni nchumu. Eku sunguleni ka vunghana bya vona Masingita a ri karhi a rhandzana na Kuvonakala un'wana wa vanakuloni va xikolo kwale xikolweni xa vona. Homboloka yena a ri karhi a rhandzana na Mudau un'wana wa mudyondzisi kwale xikolweni xa vona.

Homboloka u vuye a byela Masingita leswaku a tshika Kuvonakala hikuva i xisiwana. A lava leswaku a ya rhandzana na Maceke un'wana wa mudyondzisi kwale xikolweni tlhelo munghana wa Mudau loyi a rhandzana na Homboloka.Kunene Masingita u vuye a endla hi laha munghana wa yena a nga n'wi byela ha kona. Ku tshikana ka yena na Kuvonakala u vuye a rhandzana na Maceke loyi Homboloka a lava leswaku a rhandzana na yena hambi leswi swi nga tlhaveriwangiki hi sana. Ku fikile laha Masingita a nga tikuma a bihile emirini laha Maceke a nga tiboha ku ya hlangana na mana wa Masingita a kombela leswaku va nga n'wi yisi eka yena, yena u ta n'wi hlayisa a ri kwale ka vona ku kondza a heta ku n'wi akela ndzhawu ya yena laha a nga ta tshama kona kahle a nga karhatani na munhu
Kambe endzhaku ka nkarhi swi vuye swi nga ha fambi kahle ku fikela laha Masingita a nga kala a ya rhandzana na Sedzazwau nkulukumba wa maphorisa ya Makhado laha na vona va nga rhandzanisa sweswo ku kondza Masingita a kuma nakambe n'wana un'wana.Na kona endzhaku ka ku tswariwa ka n'wana yoloye swi vuye swi nga ha fambi kahle ku kondza Masingita a tlhelela ekaya tanihi leswi a va tshama swin'we kwale Makhado.Ku tlhelela ka Masingita ekaya u yile a ya tshama eka ti-rdp ta ka Nkuzani laha na kona a nga fika a rhandzana na Sevha un'wana wa xiphaza kwale ti-rdp.

Ku fikile laha mana wa yena a nga kala a ya n'wi teka leswaku a vuya a ta tshama ekaya tanihi leswi Sedzazwau a tshama a ri karhi a n'wi rilela hi mhaka ya Masingita.Ku vuya ka yena ekaya u fikile a rhandzana na Fabiyawa na van'wana ku fikela laha mana wa yena a nga kala a n'wi hlongola ekaya a ya tshama emutini wa n'wana wa xinakawa.

Laha hi laha a nga fika a hlanganisa vavanuna kona ku kondza va n'wi hisela muti lowuya a qachile eka wona. Laha hi laha a nga vuya a ehleketa ku ya kombela ku pfuniwa eka Kuvonakala no tlhela a kombela ntirho leswaku a ta kota ku riha muti wa vanhu lowu nga tshwa hikwalaho ka vunghwavava bya yena.Hi nkarhi wolowo a ri karhi a tisola embilwini leswaku hikokwalaho ka yini a tshikile Kuvonakala a nga ri na xidyoho na yena ke.Laha hi laha a nga vuya a teriwa kona hi miehleketo ya leswaku swa antswa a huma eka mhaka yo landzelela vavanuna lava nga ta tlhela va nga n'wi pfuni hi nchumu a tilavela ntirho a tirha leswaku a ta kota ku pfuxa muti wa vanhu no tlhela a hlayisa vana va yena.