About the author

Sipho R. Kekezwa

<p>Umhlali wakooC eZiphunzana eMonti, uSipho R. Kekezwa uneqela leembasa kuncwadi. </p><p>Ngaphezu kokuthatha izifundo zokubhala, ukukhatywa kweencwadi zakhe, amakhwiniba ebhalwe bomvu, kwamnceda wada wanokufumana amaqhinga okutsala nokugcina umdla wabahlalutyi, wabahleli – wabagwebi xa isiya kukhuphiswano – nawabafundi beencwadi zakhe. Ngaphandle koko, kwamnika isakhono sokujonga nokulungisa iimpazamo kwiincwadi zabanye ababhali. Ukongeza kuloo mava, iintlanganiso zocweyo lwababhali nolwabahleli eziququzelelwa ngamaziko afana naweThala leeNcwadi loMzantsi Afrika, kunye neziko lweeLwimi iPanSALB kube negalelo elingummangaliso ekukhuleni kwakhe, kwamnika nokuzithemba.</p><p>Sithetha nje usebenzela iqaqobana lamaziko asebenza ngeencwadi, enikezela ngeenkonzo ezinjengokuhlalutya, ukuhlela, ukucokisa kanti ukwasebenza nangezababhali jikelele. Ukuza kuthi gaa ngoku uphengulule wahlalutya amashumishumi eencwadi, wahlela ngaphaya kwamashumi amathandathu, waguqulela esiXhoseni iqaqobana leencwadi, ngaphandle kwamaxwebhu awayewaguqulela ukusuka esiNgesini nakulwimi lweAfrikansi ukuya esiXhoseni, oku ekwenzela uMaspala weCape Agulhus.</p><p>Nangona wayenqwenela ukubhala ngesiXhosa, izifundo ne<em>Intec College</em> zamvula amehlo watsho wakwazi ukubhala nangesiNgesi. Iziphumo zoko yaba kukupapashwa kweqela lamabali amafutshane kwimagazini i<em>Drum</em>, esengumgcinizitshixo nomcoci kwisikolo samabanga aphantsi iNkazimlo eMakhaza, eKhayelitsha, eKapa. Ngaphambi koku, ilinge lakhe lokuqala ngqa ukupapashwa nelamkhuthazayo yaba yileta eya kumhleli eyachongwa njengegqwesileyo kwiphephandaba lasekuhlaleni esasebenza eNkazimlo apho<em>. </em>Sithetha nje selepapashe iqela leencwadi, ekwaphumelele neembasa eziliqela esiNgesini nasesiXhoseni. EsiNgesini ubhala amabali amafutshane aze abe ngumhlalutyi nomhleli weencwadi, esiXhoseni ubhala amabali amafutshane, iincwadi zabantwana, iinoveli, idrama kunye nemibongo.</p><p>Ukwafundisa ababhali abasakhasayo ebaxhobisa ngesakhono sokubhala. Amabali ababhali abathathu ababe yinxalenye yew<em>orkshop</em><strong> </strong>yakhe yokuqala akhethwa ze apapashwa kwincwadi ethi, <em>Cape Town: Writing my City. </em>Ngoku uququzelela iintlanganiso zocweyo apho axhobisa ababhali abasakhasayo ngezakhono zokubhala.</p><p>   </p><p></p>